Me rastin e Ditës së Lirisë së Shprehjes, kryetari i Këshillit Kombëtar Shqiptar (KKSh), Enkel Rexhepi, ka pritur në takim gazetarë dhe përfaqësues të mediave nga Kosova dhe Lugina e Preshevës, me të cilët ka diskutuar mbi sfidat me të cilat përballen mediat në këtë rajon.
Sipas KKSh-së, një nga shqetësimet kryesore mbetet mungesa e mbështetjes financiare për mediat në gjuhën shqipe në Luginën e Preshevës. Në deklaratë thuhet se fondet e destinuara për këtë qëllim, përmes institucioneve të Kosovës, janë bllokuar nga Qeveria e Serbisë.
“Këshilli mbetet i përkushtuar në promovimin e mediave të lira dhe të pavarura në Luginën e Preshevës, si një parakusht për informim të drejtë dhe një e drejtë themelore në shoqëritë demokratike,” thuhet në qëndrimin e KKSh-së.
Gjatë takimit u diskutua gjithashtu për rëndësinë e forcimit të bashkëpunimit mes mediave shqiptare në rajon dhe nevojën për kushte më të mira për funksionimin e tyre.
KKSh thekson se liria e medias dhe informimi në gjuhën shqipe mbeten ndër prioritetet kryesore të punës së saj./BujanociNet/
