Kryeministri australian u fishkëllua në një xhami – “Pse është këtu, nxirreni jashtë”

Kryeministri i Australisë, Anthony Albanese, u fishkëllua gjatë një lutjeje në një xhami në Sydney që ishte organizuar për përfundimin e muajit të shenjtë të Ramazanit.

Albanese dhe ministri i Punëve të Brendshme, Tony Burke, vizituan xhaminë Lakemba – një nga më të mëdhatë në Australi – pas ftesës së udhëheqësve të komunitetit musliman për të marrë pjesë në lutjet e Eid al‑Fitr të premten në mëngjes, sipas kohës lokale.

Disa nga të pranishmit akuzuan kryeministrin dhe ministrin se mbështesin “gjenocidin”. Protesuesit i fishkëllyen atyre dhe u kërkuan që të largoheshin nga xhamia. Brenda komunitetit musliman në Australi ka pakënaqësi të thellë për shkak të mënyrës se si qeveria ka reaguar ndaj luftës në Gazë.

▶ Lexo edhe këtë nga Bota

Trump: Jo menjëherë, por do të tërhiqemi shumë shpejt nga Irani SHBA-të nuk janë ende gati të largohen nga Irani, por Trump paralajmëron largim të afërt. Një gazetar e...

Një burrë që po bërtiste ndaj Albanese u largua nga xhamia nga policia, por më vonë u lirua pa asnjë akuzë dhe iu tha të largohej.

Kryeministri u largua duke kaluar mes turmës, ndërsa disa persona vazhduan të bërtisnin ndaj tij. Një protestues tha “Pse ai është këtu? Nxirrni jashtë! Turp”.

Pak çaste pasi u përmbyll ngjarja, Shoqata Myslimane Libaneze, që administron xhaminë, publikoi një njoftim duke theksuar se Albanese ishte mirëpritur për lutje.

Ata thanë se e kuptojnë emocionin e lartë për shkak të vuajtjeve të vazhdueshme në Gazë dhe shkatërrimeve në Liban, por theksuan se takimi me udhëheqësit e zgjedhur është mënyra për t’u dhënë zë shqetësimeve të komunitetit, jo për ta tradhtuar atë.

Albanese deklaroi më pas se shumica e 30 mijë besimtarëve e pranuan mirë dhe se reagimi ishte kryesisht shumë pozitiv. Ai sugjeroi se reagimi negativ i disa protestuesve kishte lidhje me vendimin më të fundit të qeverisë së tij për të ndaluar organizata ekstremiste si Hizb ut‑Tahrir, të cilat janë kritikuar për lavdërimin e terrorizmit.

Raportet thonë se incidentet anti‑semite dhe islamofobe janë rritur në Australi që nga sulmi i Hamasit ndaj Izraelit më 7 tetor 2023 dhe që nga ofensiva izraelite në Gazë. Përplasjet dhe tensionet rreth politikës së qeverisë australiane lidhur me konfliktin kanë nxitur kritika në disa komunitete. /Telegrafi/