Presidenti ukrainas Volodymyr Zelensky ka kundërshtuar idenë e zhvillimit të zgjedhjeve gjatë luftës me Rusinë, vetëm katër ditë pasi ish-ministri i Mbrojtjes, Mykhailo Fedorov, bëri thirrje publike që Ukraina të rikthehej në procesin zgjedhor.
“Besoj se në një luftë të tillë, zgjedhjet përbëjnë një rrezik shumë të madh. Zgjedhjet tani do të ishin një cunami për vendin që do ta ndante Ukrainën”, deklaroi Zelensky në komentet e bëra publike të dielën.
Debati u ndez pasi Fedorov, i cili u shkarkua nga posti i ministrit muajin e kaluar, publikoi një video ku kërkonte krijimin e një mekanizmi ligjor, të sigurt dhe realist që do t’i mundësonte Ukrainës të zhvillonte zgjedhje edhe gjatë luftës.
“Demokracia nuk mund të mbahet peng nga Rusia”, deklaroi Fedorov, duke argumentuar se Ukraina po lufton pikërisht për të mbetur një shtet i lirë dhe evropian.
Thirrja e ish-ministrit u interpretua gjerësisht si një nga sfidat më të mëdha politike ndaj Zelenskyt që nga fillimi i pushtimit rus. Megjithatë, Fedorov nuk ka deklaruar nëse ka ambicie për të kandiduar vetë në një proces të ardhshëm zgjedhor.
Zelensky vendosi gjendjen e jashtëzakonshme ushtarake pas pushtimit rus në shkurt të vitit 2022. Kuadri aktual ligjor në kohë lufte nuk lejon zhvillimin e zgjedhjeve kombëtare.
Në një intervistë për BBC-në të transmetuar të dielën, Fedorov tha gjithashtu se Zelensky ka “pyetje për t’u përgjigjur” lidhur me pretendimet për korrupsion brenda qeverisë, duke iu referuar një hetimi për pastrim parash të bërë publik javën e kaluar.
Ai u shpreh se ukrainasit nuk duhet të kenë frikë të diskutojnë mundësinë e zgjedhjeve edhe gjatë luftës.
“Nëse nuk mund t’i ndaj idetë e mia dhe të jem i hapur me shoqërinë time, atëherë për çfarë po luftojmë?”, tha Fedorov.
Zelensky e shkarkoi Fedorovin në mesin e korrikut, duke e lidhur vendimin me një konflikt të pazgjidhshëm mes tij dhe komandantit të lartë ukrainas, Oleksandr Syrskyi.
Fedorov kishte fituar reputacion të madh gjatë luftës, veçanërisht për rolin e tij në forcimin e kapaciteteve ushtarake ukrainase dhe zgjerimin e sulmeve me dronë në territorin rus. Largimi i tij shkaktoi protesta në disa qytete të Ukrainës, ku mijëra qytetarë shprehën kundërshtimin ndaj vendimit.
Ndërkohë, përplasja e fundit mbi zgjedhjet pritet të ushqejë debatin e brendshëm politik në Ukrainë, në një kohë kur vendi vazhdon luftën dhe përballet me presion të madh ushtarak, ekonomik dhe politik. /Telegrafi/
