Këngëtari dhe anëtari i PDK-së, Genc Prelvukaj, ka qenë së fundmi i ftuar në Klan Kosova, ku ka folur për vendimin e Gjykatës Speciale ndaj ish-katërshes së UÇK-së dhe zhvillimet që pritet të pasojnë në fazën e Apelit.
Gjatë diskutimit, Prelvukaj ka deklaruar se Serbia do ta përdorë këtë vendim kundër Kosovës, duke thënë se Beogradi nuk ka kursyer metoda të ndryshme për të ndikuar në zhvillimet që lidhen me Kosovën.
“Është e qartë se Serbia nuk ka kursyer asnjëherë metoda, qoftë nga rekrutimi, qoftë nga metodat diplomatike, politike e kudo që të jetë e derisa nuk do të kursejë metoda që edhe faza e Apelit ta ketë të njëjtin interpretim”, ka deklaruar ai.
Prelvukaj theksoi se Kosova duhet të jetë e përgatitur për zhvillimet e ardhshme dhe të ketë një qasje të koordinuar përballë situatës.
Sipas tij, është i nevojshëm uniteti dhe organizimi sa më efektiv në mënyrë që të parandalohet një skenar i tillë.
“Ne duhet të jemi të përgatitur, unik, në formë sa më efektive, që ta parandalojmë një gjë të tillë duke u organizuar në mënyrë më të mirë të mundshme”, shtoi mes tjerash.
Deklaratat e tij vijnë pas vendimit ndaj ish-katërshes së UÇK-së, ndonëse procesi pritet të vazhdojë në fazën e Apelit. /Telegrafi/
