Vdes aktivisti i çështjes kombëtare dhe ish i burgosuri politik, Mentor Kaçi

Ka vdekur aktivisti i çështjes kombëtare dhe ish i burgosuri politik, Mentor Kaçi.
Lajmin për vdekjen e tij e ka dhënë gazetari Ngadhnjim Haxhosaj, i cili po ashtu shkroi pak për veprimtarinë dhe angazhimin e tij për liri.
“Është ndarë nga jeta Mentor Kaçi, njëri ndër patriotët që veproi dhe kontribuoi kundër sistemit të Serbisë dhe ish-Jugosllavisë. Mentor Kaçi, i shkolluar për montazh, por asnjëherë nuk e ndali veprimtarinë patriotike, u burgos në vitin 1981 dhe u torturua në mënyrë çnjerëzore në burgun e Prishtinës dhe të Prizrenit, ku ishte dënuar me 10 vite burg. Baca Mentor nuk u ndal as pas daljes nga burgu dhe vazhdoi veprimtarinë e tij, duke qenë njëri ndër organizatorët e Frontit Kombëtar, ku bashkë me shumë patriotë vuri në lëvizje në vitin 1990 këtë organizatë, e cila kishte synim të luftojë Serbinë me pushkë e me penë. Ai u burgos bashkë me shumë anëtarë të këtij grupi dhe vuajti dënimin me 7 vite burgim. Mentor Kaçi do të kujtohet si njeri idealist, trim, i dashur dhe i mençur. Lavdi veprës së Bacës Mentor”, ka shkruar Haxhosaj.
Kaçi lindi në Gjakovë më 1952 dhe vdiq mbrëmë, më 25 shkurt 2026.

Lexo edhe nga Nacionale

Turistë nga Brazili dhe Argjentina dashurohen me Vlorën, mendojnë edhe të punojnë Vlora, përveç Evropës, po tërheq vëmendjen gjithnjë e më shumë edhe të të rinjve apo turistëve nga kontinente...