Sekretari amerikan i Shtetit, Marco Rubio, ka thënë se Rusia dhe Ukraina kanë shprehur interes për një armëpushim të kufizuar që do të përfshinte sektorët e energjisë dhe grurit.
Rubio i bëri komentet pas takimit me ministrin e Jashtëm rus, Sergei Lavrov, në New York.
I pyetur nëse Moska është e interesuar për një armëpushim në sektorin energjetik, Rubio tha se të dyja palët kanë shprehur interes për një marrëveshje të kufizuar, raportoi skynews.
“Kjo nuk e zgjidh luftën, por në njëfarë mënyre mund të lehtësojë potencialisht disa nga presionet globale që po ndihen”, tha Rubio.
Ai shtoi se Shtetet e Bashkuara janë të gatshme të luajnë “një rol konstruktiv” për të ndihmuar në realizimin e një armëpushimi të tillë.
Sipas Rubios, një marrëveshje e kufizuar mund të shërbejë si pikënisje për negociata më të gjera mes palëve.
“Ndoshta mund të shërbejë si bazë ose platformë për një marrëveshje më të gjerë”, tha ai.
Rubio ka konfirmuar se presidenti rus, Vladimir Putin, është ftuar në samitin e ardhshëm të G20-s, shkruan skynews.
Samiti i G20-s do të mbahet në Miami të SHBA-së në dhjetor. /Telegrafi/
