Presidenti i Iranit, Masoud Pezeshkian, iu drejtua Asamblesë së Përgjithshme të Kombeve të Bashkuara dhe menjëherë reagoi ndaj deklaratave të presidentit amerikan, Donald Trumpit të bëra një ditë më parë.
“Presidenti i Shteteve të Bashkuara na përshkroi si terroristë. Ne kemi qenë viktima të terrorizmit”, tha Pezeshkiani.
“Unë vij nga një Iran ku lideri ynë i nderuar suprem u vra pa asnjë bazë ligjore apo arsye”, shtoi ai.
“Vij nga një Iran ku, në të vërtetë, ata bombarduan një shkollë”, deklaroi presidenti iranian.
Gjatë fjalimit, Pezeshkiani ngriti fotografi të fëmijëve që u vranë në bombardimin e një shkolle në Minab, në muajin shkurt.
“Fëmijë të pafajshëm, të cilët në të vërtetë nuk kishin kryer asnjë krim, asnjë mëkat”, tha ai.
Shtetet e Bashkuara kanë mohuar se kanë shënjestruar qëllimisht civilët dhe kanë nisur një hetim për sulmin ndaj shkollës.
Një ditë më parë, Donald Trump përdori fjalimin e tij në Asamblenë e Përgjithshme të OKB-së për të argumentuar në favor të luftës së SHBA-së kundër Iranit, duke paralajmëruar se mund ta “asgjësonte Republikën Islamike” nëse nuk arrihet një marrëveshje për t’i dhënë fund konfliktit.
“Kam një vendim të madh për të marrë. A do të arrihet një marrëveshje me Iranin që do t’i lejojë ata të rindërtohen dhe të krijojnë një vend shumë më të fuqishëm se ç’kanë qenë ndonjëherë më parë?”, tha Trump.
“Ose ta asgjësoj Republikën Islamike dhe ta bëj këtë shpejt, duke mos u dhënë kurrë mundësinë të vrasin dhe shkatërrojnë përsëri njerëz dhe vende?”, shtoi ai.
Më vonë, Trump u tha gazetarëve në OKB se zyrtarët amerikanë kishin zhvilluar një takim “shumë të mirë” treorësh me delegacionin iranian.
Trump parashikoi se administrata e tij do të arrijë një marrëveshje paqeje me Iranin pas zgjedhjeve afatmesme amerikane të 3 nëntorit, megjithëse nuk ishte e qartë pse në atë moment do të kishte më shumë gjasa për arritjen e një marrëveshjeje. /Telegrafi/
