Një ngjarje e përmasave historike ka shënuar jetën politike dhe kombëtare në Bujanoc. Presidenti i Republikës së Shqipërisë, Shkëlqesia e Tij Bajram Begaj, ka zhvilluar një vizitë zyrtare në komunën tonë, ku është pritur në një takim të veçantë nga Kryetari i Komunës, Arbër Pajaziti.
Përmes një njoftimi të ndarë në profilin e tij zyrtar, kryetari Pajaziti e ka cilësuar këtë vizitë si një moment sa të rëndësishëm, aq edhe emocionues për të dhe për mbarë Komunën e Bujanocit.
Ai ka theksuar se ishte një nder i veçantë ta priste kreun e shtetit shqiptar, me të cilin ka zhvilluar një bisedë të hapur, vëllazërore dhe plot mirëkuptim.
Gjatë këtij takimi të rëndësishëm, Pajaziti ka pasur mundësinë t’ia parashtrojë nga afër Presidentit Begaj të gjitha shqetësimet dhe sfidat kryesore me të cilat përballet popullata shqiptare në Luginë, ndonëse presidenti ishte tashmë mjaft i informuar rreth situatës në terren.
Palët theksuan rëndësinë jetike të koordinimit të vazhdueshëm ndërmjet Luginës dhe institucioneve të shtetit shqiptar, duke përshëndetur faktin që Lugina e Preshevës tashmë është vendosur lart në agjendën e politikës së jashtme të Shqipërisë, përmes Ministrisë për Evropën dhe Punët e Jashtme.
Kryetari Pajaziti ka shprehur mirënjohjen e tij të thellë për mbështetjen e deritanishme të Republikës së Shqipërisë, si përmes pranisë së saj institucionale, ashtu edhe përmes projekteve konkrete që kanë ndihmuar qytetarët tanë.
Në këtë kuadër, ai ka veçuar edhe kontributin e jashtëzakonshëm të ambasadorit Bardhyl Canaj, i cili ishte pjesë e delegacionit presidencial dhe ka qenë vazhdimisht një zë i fuqishëm pranë Luginës.
Në fokus të diskutimeve ishin gjithashtu sfidat rajonale, si dhe roli udhëheqës i Shqipërisë në proceset e integrimit evropian.
Gjatë takimit, kreu i komunës ka marrë garanci të plota se mbështetja e shtetit shqiptar do të vazhdojë fuqishëm edhe në të ardhmen, duke u shtrirë në të gjitha fushat e jetës shoqërore në Luginë.Në përmbyllje të kësaj vizite të rëndësishme, dhe siç e kërkon tradita e pastër vëllazërore, udhëheqësit kanë shkëmbyer dhurata simbolike në shenjë respekti dhe kujtimi për këtë ngjarje, e cila padyshim do të mbetet një faqe e ndritur në marrëdhëniet e Republikës së Shqipërisë me shqiptarët e Luginës së Preshevës./BujanociNet/
