Përplasje me armë jashtë një klubi nate në Birmingham, dy persona dënohen me nga 18 vjet burg

Dy persona janë dënuar me nga 18 vjet burg secili, pasi shkëmbyen të shtëna me armë zjarri jashtë një klubi nate në Birmingham të Anglisë, duke plagosur edhe një kalimtar të pafajshëm.

Aaron Nubie, 46 vjeç, dhe Kimani Durrell-Smith, 27 vjeç, qëlluan ndaj njëri-tjetrit jashtë klubit FJ Lounge, në zonën Aston, në orën 06:00 të mëngjesit të 23 marsit. Gjatë shkëmbimit të zjarrit u plagos edhe një punëtor i një tezge ushqimore, por lëndimet e tij nuk ishin kërcënuese për jetën.

Sipas hetimeve, dy burrat ishin përfshirë në një debat brenda klubit më herët gjatë mbrëmjes. Nubie ishte larguar nga lokali, por më vonë u kthye i armatosur dhe qëlloi ndaj Durrell-Smithit, teksa ky i fundit po largohej nga objekti.

Pamjet e kamerave të sigurisë tregojnë momentin kur Nubie hap zjarr, ndërsa Durrell-Smith tërhiqet dhe më pas kundërpërgjigjet duke qëlluar drejt tij, pranë personave të tjerë dhe një tezge të mbushur me njerëz, transmeton Telegrafi.

Lexo edhe nga Bota

Hidhet gaz lotsjellës në një klub nate në Bosnjë, 38 të lënduar – dalin pamje 38 persona kanë pësuar lëndime kur një person i panjohur kishte hedhur një substancë që dyshohet të jetë...

Rreth 30 minuta pas përplasjes, Nubie u paraqit në një spital me plagë nga arma e zjarrit, por u tha policëve se nuk e mbante mend se si ishte lënduar.

Ai u arrestua, ndërsa Durrell-Smith u lokalizua nga policia në një adresë në West Bromwich, pas zbatimit të një urdhërkontrolli për armë zjarri. Edhe ai ishte i plagosur, por nuk pranoi të tregonte se si kishte ndodhur.

Hetuesit e policisë së West Midlands shqyrtuan pamjet e kamerave të sigurisë dhe identifikuan regjistrimin e shkëmbimit të të shtënave.

Të dy burrat u shpallën fajtorë për plagosje me qëllim në tetorin e vitit të kaluar, ndërsa më herët kishin pranuar edhe akuzën për posedim të armës së zjarrit.

Të enjten, gjykata i dënoi secilin me 18 vjet burg. Pas incidentit, për klubin FJ Lounge u lëshua gjithashtu një urdhër për mbyllje.

Rreshteri hetues Phil Hinton tha se të dy burrat kishin vendosur të armatoseshin dhe të qëllonin ndaj njëri-tjetrit në distancë të afërt, duke rrezikuar jo vetëm jetën e tyre, por edhe atë të personave të tjerë.

Ai theksoi se plagosja e një qytetari të pafajshëm tregon natyrën e pamatur dhe egoiste të veprimeve të tyre, duke shtuar se policia do të vazhdojë përpjekjet për të identifikuar dhe vënë para drejtësisë personat e përfshirë në krimet me armë zjarri. /Telegrafi/