Dokumentari “The Real Rooneys”, që ndjek jetën e Wayne dhe Coleen Rooney në rezidencën e tyre luksoze në Cheshire, është kritikuar ashpër për mënyrën se si paraqet jetën e çiftit.
Sipas autorit të shkrimit, krijon më shumë një imazh të kuruar dhe të kontrolluar sesa një portret real të familjes.
Kritika thekson se episodet janë të mbushura me përsëritje, montazh të shpejtë dhe skena të inskenuara, ndërsa çdo detaj duket i përzgjedhur për të shmangur paraqitjen e çiftit në një dritë negative.
Në vend të një rrëfimi të sinqertë, dokumentari përshkruhet si një version i idealizuar i jetës së tyre luksoze.
Një nga kritikat kryesore lidhet me faktin se seriali nuk trajton historinë e Wayne Rooneyt me problemet me alkoolin dhe akuzat për tradhti, pavarësisht se këto kanë qenë pjesë e raportimeve publike ndër vite.
Autori argumenton se, duke e quajtur serialin “The Real Rooneys”, mungesa e këtyre temave e bën pretendimin për autenticitet të diskutueshëm.
Në vend të problemeve personale, shikuesit shohin çiftin duke shijuar jetën në rezidencën e tyre: duke përdorur biçikleta elektrike dhe go-karta, duke luajtur futboll dhe duke kaluar kohë në pishinat e shtëpisë.
Edhe largimi i Wayne nga drejtimi i Plymouth Argyle paraqitet kryesisht si fillimi i një “udhëtimi të ri emocionues”, pa u ndalur te rezultatet e tij në atë periudhë.
Kritikon gjithashtu mënyrën se si paraqitet shtëpia e familjes, duke vënë në dukje luksin e tepruar dhe praninë e dukshme të stafit, edhe pse punonjësit e shtëpisë pothuajse nuk shfaqen.
Sipas autorit, kjo krijon një tjetër kontrast mes jetës së paraqitur në ekran dhe realitetit të një familjeje jashtëzakonisht të pasur.
Coleen përpiqet vazhdimisht të theksojë se familja është ende “autentike” dhe e pandryshuar, madje edhe kur ndalojnë në McDonald’s gjatë një udhëtimi në Skoci.
Por autori e përdor këtë skenë si shembull të ironisë së dokumentarit, duke vënë në dukje se Coleen porosit ushqim të zakonshëm derisa mban bizhuteri shumë të shtrenjta.
Në përfundim, kritika argumenton se “The Real Rooneys” nuk ofron një pamje të plotë dhe të paanshme të jetës së çiftit, por një version të kontrolluar, luksoz dhe të kuruar për publikun.
Autori shpreh zhgënjim pikërisht sepse seriali pretendon të tregojë “të vërtetën”, ndonëse shmang disa nga aspektet më të diskutueshme të historisë së çiftit. /Telegrafi/
