Në episodin e radhës të podcastit “Arena e Yjeve”, mysafir ishte Besim Shala, kryesues i Komisionit për Vërtetime të Ligjit të Sponsorizimit në Sport, i cili flet për një nga çështjet më të rëndësishme për zhvillimin e sportit në Kosovë – financimin përmes ligjit të sponsorizimit. Ky episod realizohet me mbështetjen e sponsorit zyrtar Exfis.
Gjatë bisedës, Shala shpjegon se cilat janë kriteret kryesore që duhet t’i plotësojnë klubet, federatat dhe organizatat e tjera për të përfituar nga ligji i sponsorizimit, si dhe procedurat që duhet të ndjekin gjatë aplikimit për vërtetimin e sponsorizimeve.
Një pjesë e rëndësishme e intervistës i kushtohet shifrave të sponsorizimit në sportin kosovar. Shala tregon sa kërkesa janë shqyrtuar gjatë dy viteve të fundit dhe sa mjete financiare kanë përfituar klubet dhe federatat përmes këtij mekanizmi.
Në këtë kontekst, vëmendje i kushtohet edhe arsyeve më të shpeshta për refuzimin e kërkesave për sponsorizim, gabimeve që bëhen gjatë aplikimit dhe çështjeve që duhet të kenë parasysh përfituesit për të përmbushur kriteret e përcaktuara me ligj.
Shala flet gjithashtu për funksionimin dhe zbatimin e ligjit, transparencën në procesin e vërtetimit të sponsorizimeve dhe përgjegjësinë që kanë klubet e federatat për përdorimin e mjeteve të përfituara. Biseda prek edhe sfidat me të cilat përballen institucionet dhe organizatat sportive gjatë këtij procesi.
Një tjetër temë e rëndësishme është shpërndarja e mbështetjes financiare në sportin kosovar, përfshirë nevojën që përfitimet nga sponsorizimet të ndikojnë edhe në zhvillimin e talenteve të reja, sporteve më pak të përfaqësuara dhe sportit të femrave.
Në pjesën e fundit të bisedës, Shala ndalet te sfidat që mbeten përpara dhe rëndësia e informimit të klubeve, federatave dhe organizatave joqeveritare për mundësitë që ofron ligji i sponsorizimit. Ai gjithashtu përcjell një thirrje për këto organizata që të informohen për kriteret dhe procedurat, në mënyrë që të shfrytëzojnë mundësitë për mbështetje financiare.
Episodin e plotë me Besim Shalën mund ta ndiqni në kanalin zyrtar të Telegrafit në YouTube./Telegrafi/
– YouTube www.youtube.com
