Gjiganti elektronik LG ka mohuar zyrtarisht pretendimet se televizorët e tij inteligjentë regjistrojnë në mënyrë të fshehtë bisedat e përdoruesve, edhe kur ekrani i televizorit është i fikur.
Debati shpërtheu pas publikimit të një videoje rreth dyorëshe nga Gamers Nexus, e cila u bë virale dhe ngriti shqetësime serioze për mënyrën se si televizorët inteligjentë të LG-së mbledhin dhe përpunojnë të dhënat, transmeton Telegrafi.
Sipas raportit, televizorët mund të regjistrojnë audio, ndërsa njëkohësisht mbledhin informacione mbi pajisjet e lidhura në rrjet, të dhëna për vendndodhjen dhe informacion rreth rrjetit wireless.
Videoja shkaktoi një valë reagimesh në internet, me dhjetëra materiale të tjera që paralajmëronin përdoruesit për mënyrën se si mund të kufizohet mbledhja e të dhënave nga televizorët inteligjentë. Në mesin e kanaleve që trajtuan çështjen ishin edhe Linus Tech Tips dhe RTINGS.
Përballë këtyre akuzave, LG publikoi një deklaratë zyrtare me titullin “Understanding Privacy on LG Smart TVs”, në të cilën kundërshton në mënyrë të drejtpërdrejtë pretendimin kryesor të videos.
Kompania thekson se televizorët e saj inteligjentë nuk regjistrojnë dhe nuk transmetojnë vazhdimisht bisedat e përdoruesve.
Sipas LG-së, përpunimi i të folurit për shndërrimin në tekst nis vetëm kur përdoruesi aktivizon një funksion zanor, qoftë përmes një fjale të caktuar aktivizuese ose duke shtypur butonin e zërit apo inteligjencës artificiale në telekomandë.
Kompania thotë se audioja e përdorur për zbulimin e fjalës aktivizuese përpunohet lokalisht në televizor. Nëse nuk zbulohet fjala përkatëse, audioja nuk shndërrohet në tekst, nuk ruhet dhe nuk transmetohet.
LG pranon se gjatë përdorimit të komandave zanore mund të krijohen rezultate të njohjes së zërit dhe regjistra teknikë. Megjithatë, sipas kompanisë, këto lidhen me ndërveprime specifike zanore dhe nuk nënkuptojnë regjistrim të vazhdueshëm të bisedave jashtë një sesioni aktiv të njohjes së zërit.
LG gjithashtu pretendon se rezultatet e njohjes së zërit mund të përdoren për funksionet që lidhen me komandat zanore, por nuk ngarkohen më vonë në serverë vetëm sepse televizori rikthehet online.
Kompania ka theksuar gjithashtu se disa prej funksioneve që mund të mbledhin më shumë informacion mbi përdoruesin janë opsionale.
Një prej tyre është Automatic Content Recognition (ACR), teknologji që analizon përmbajtjen që shikohet në televizor për të ndihmuar në ofrimin e rekomandimeve më të personalizuara.
Pavarësisht mohimit të LG-së, debati nuk është mbyllur. Kritikët kanë ngritur pikëpyetje jo vetëm për mënyrën se si funksionojnë këto teknologji, por edhe për formulimin e deklaratës së kompanisë.
Veçanërisht, përdorimi i termit “nuk regjistrojnë vazhdimisht” ka nxitur pyetje nëse kjo lë hapësirë për regjistrime në rrethana të tjera, edhe pse LG këmbëngul se audioja përpunohet vetëm kur përdoruesi aktivizon një funksion zanor.
Përtej rastit të LG-së, kjo polemikë rikthen një debat më të gjerë mbi televizorët inteligjentë dhe pajisjet e lidhura me internetin: sa të dhëna duhet të mbledhin pajisjet për t’u ofruar përdoruesve komoditet dhe shërbime më të personalizuara dhe ku duhet të vendoset kufiri për privatësinë?
Rasti i fundit tregon se transparenca mbi mënyrën se si mblidhen, përpunohen dhe ruhen të dhënat po bëhet gjithnjë e më e rëndësishme për konsumatorët, veçanërisht ndërsa pajisjet elektronike po integrojnë gjithnjë e më shumë funksione të inteligjencës artificiale dhe komandave zanore.
