Kongresisti amerikan noton drejt vendit të sigurt pasi aeroplani i tij ulet në një liqen

Një fluturim i zakonshëm u shndërrua në një situatë dramatike, pasi aeroplani me të cilin udhëtonte kongresmeni republikan amerikan Tom Tiffany pësoi një defekt mekanik dhe u detyrua të kryente një ulje emergjente në një liqen në Wisconsin.

Tiffany, i cili është kandidati republikan për guvernator të Wisconsin-it, tha se pësoi lëndime të lehta pasi avioni u ul në ujërat e Lake Wausau të shtunën mbrëma. Pas uljes, ai dhe piloti u detyruan të dilnin nga avioni dhe të notonin drejt ujërave të cekëta për të shpëtuar.

Sipas zyrës së Sherifit të Marathon County, avioni pësoi një problem mekanik ndërsa po i afrohej aeroportit Wausau Downtown, duke e detyruar pilotin të kryente uljen emergjente në liqen.

Tiffany tha se ai dhe piloti telefonuan menjëherë në numrin e emergjencës 911 pasi avioni u ul në ujë.

Lexo edhe nga Bota

Si pastrimi i ajrit po përshpejton ngrohjen globale – dhe po zbulon një problem më të madh Këtë korrik, gjatë verës me temperatura rekord në Britani, në platformën X shpërtheu një debat kurioz mbi shkencën...

“Ndërsa avioni filloi të zhytej, dolëm prej tij dhe notuam drejt një zone të cekët, ku pritëm derisa ekipet e emergjencës arritën tek ne me varkë”, shkroi kongresmeni në rrjetet sociale.

Raporti i autoriteteve tregon se telefonata për aksidentin u pranua në orën 20:49 sipas kohës lokale. Rreth 15 minuta më vonë, në orën 21:05, një ekip i Departamentit të Zjarrfikësve të Wausau arriti në vendngjarje me një mjet lundrues dhe i nxori të dy nga uji.

Tiffany dhe piloti ishin dy personat e vetëm në bord.

Tiffany tregoi se ishte duke u kthyer në shtëpi pas një darke në La Crosse County, kur avioni humbi papritur fuqinë ndërsa po i afrohej aeroportit.

“Zoti po kujdesej për ne sonte dhe jam jashtëzakonisht mirënjohës që jam këtu në spital, me gruan time, Chris, pranë meje”, deklaroi ai.

“Një përvojë e tillë të kujton se sa e çmuar është jeta”, shtoi kongresmeni.

Fushata e Tiffany-t bëri të ditur se ai pësoi një prerje të vogël mbi syrin e djathtë, ndërsa edhe piloti mori lëndime të lehta.

Aeroplani ishte një Beechcraft K35, një aeroplan me një motor, i njohur gjithashtu si Bonanza, i cili mund të transportojë deri në pesë persona.

Shkaku i saktë i defektit mekanik nuk është bërë ende i ditur.

Zyra e Sherifit të Marathon County njoftoi se incidenti do të hetohet nga Administrata Federale e Aviacionit (FAA) dhe Bordi Kombëtar i Sigurisë së Transportit (NTSB).

Ndërkohë, aeroplani mbetet ende në ujërat e Lake Wausau, ndërsa ekipet e emergjencës po punojnë për nxjerrjen e tij nga liqeni. /Telegrafi/