Federata e Futbollit të Irlandës (FAI) ndërpreu menjëherë konferencën për shtyp të përzgjedhësit Heimir Hallgrimsson, para ndeshjes së Ligës së Kombeve ndaj Izraelit, pas një akuze të bërë nga një gazetar izraelit, të cilën zyrtarët irlandezë e cilësuan si të pavërtetë.
Gjatë fitores 3-0 të Irlandës ndaj Izraelit në Debrecen të Hungarisë, javën e kaluar, tifozët izraelitë u akuzuan se kishin drejtuar kore raciste ndaj sulmuesit irlandez Adam Idah. UEFA deklaroi se nuk mund të hetonte këto pretendime, pasi procedurat e duhura për raportimin e incidentit nuk ishin ndjekur në kohën e duhur.
Hallgrimsson doli para mediave të shtunën pasdite, në kuadër të konferencës së zakonshme para ndeshjes që Irlanda do ta zhvillonte të dielën në mbrëmje. Megjithatë, FAI u detyrua ta ndërpriste transmetimin e drejtpërdrejtë të konferencës para kohe.
Në momentet e fundit të konferencës, një gazetar izraelit mori mikrofonin dhe akuzoi futbollistët irlandezë se kishin përdorur një fyerje raciste ndaj lojtarëve të Izraelit gjatë përballjes së tyre të fundit në Ligën e Kombeve.
“Kjo është plotësisht e pavërtetë”, reagoi menjëherë një zyrtar i komunikimit i Federatës. “Kjo është plotësisht e pavërtetë. Në rregull, konferenca përfundon këtu”.
“Unë po e bëj punën time, miku im. Po e bëj punën time”, u përgjigj gazetari, duke kundërshtuar ndërprerjen e tij. “Nuk mund të ma merrni mikrofonin. Nuk mund ta bëni këtë”.
Kur zyrtari irlandez e akuzoi se po transmetonte një gënjeshtër, gazetari reagoi: “Ata nuk po gënjejnë për këtë. Kështu kanë thënë ata. Mos më prek, njeri”.
Në sallën e konferencës nuk ishte i pranishëm asnjë delegat i UEFA-s.
Aty ndodheshin vetëm Hallgrimsson dhe dy zyrtarë të tjerë, ndërsa njëri prej tyre u përpoq t’i drejtonte gazetarët irlandezë drejt një salle tjetër./Telegrafi/
