Pas disa vitesh pritjeje, më në fund janë prezantuar planet për prishjen e njërit prej stadiumeve më legjendare në Evropë, “San Siros”, si dhe koncepti për ndërtimin e një stadiumi të ri.
Sipas mediave italiane, stadiumi i ri do të ketë një kapacitet më të vogël, ndërsa punimet për ndërtimin e tij pritet të nisin vitin e ardhshëm.
Kështu do t’i jepej fund një epoke në të cilën “San Siro” ka shërbyer si shtëpia e përbashkët e dy rivalëve të qytetit, Milanit dhe Interit, për më shumë se një shekull.
Siç raporton Gazzetta dello Sport, studiot e njohura arkitekturore Foster+Partners dhe Manica pritet të prezantojnë zyrtarisht planet e fundit për stadiumin e ri muajin e ardhshëm.
Projekti vlerësohet të kushtojë rreth 2.15 miliardë euro, ndërsa stadiumi i ri do të ketë një kapacitet prej 71,500 spektatorësh.
Milani dhe Interi do të vazhdojnë ta ndajnë stadiumin e ri, ndërsa sipas vlerësimeve, të dy klubet pritet të përfitojnë rreth 265 milionë euro në kapital.
Punimet janë planifikuar të përfundojnë në kohë për Kampionatin Evropian të vitit 2032, i cili do të organizohet nga Italia dhe Turqia.
Nëse plani realizohet sipas afateve të parashikuara, një prej stadiumeve më ikonike të futbollit evropian do t’i hapë rrugën një epoke të re, duke i dhënë fund historisë së gjatë të “San Siros” si shtëpia e përbashkët e dy gjigantëve të Milanos./Telegrafi/
