Ajo i mbijetoi një ekzekutimi në SHBA, avokati: T’i zbutet dënimi.

Vrasësja amerikane Christa Pike vazhdon të jetë në gjendje kritike në spital, ndërsa prognoza e saj mbetet e paqartë pas dështimit të ekzekutimit, ka deklaruar avokati i saj.

Avokati Stephen Ferrell tha se mjekët po përpiqen ende të eliminojnë nga trupi i Pike dy doza të pentobarbitalit, substancës së përdorur gjatë procedurës së ekzekutimit.

Pike, 50 vjeçe, u dënua me vdekje pasi u shpall fajtore për vrasjen e Colleen Slemmer në vitin 1995. Ajo i mbijetoi dy përpjekjeve për ekzekutimin e saj të mërkurën dhe më pas u transportua në një spital në Nashville, Tennessee.

“Ajo është ende në spital, në ventilator dhe në gjendje kritike. Ne vërtet nuk e dimë ende prognozën dhe mund të mos e dimë për disa ditë”, tha Ferrell për CNN.

Lexo edhe nga Bota

Vila private, pishina dhe fushë golfi – zbulohet kompleksi “i fshehur” për të dënuarit VIP në Indonezi Një kompleks i fshehtë banimi për të burgosur të pasur është zbuluar në burgun Cibinong, në provincën Java...

Avokati tha se nuk beson se Pike ka rifituar vetëdijen në ndonjë moment pas procedurës. Ai shtoi se informacionet për gjendjen e saj i merr përmes personit të autorizuar për vendimmarrjen mjekësore në emër të saj dhe se nuk ka komunikuar drejtpërdrejt me mjekët.

Ferrell tha gjithashtu se nuk e ka vizituar Pike në spital, ndërsa shtoi se nuk e di se kush tjetër ka mundur ta vizitojë atë, transmeton Telegrafi.

Autoritetet e Tennessee-t ende nuk kanë bërë të ditur nëse do të tentojnë përsëri ekzekutimin e Pike dhe nuk kanë dhënë një shpjegim të plotë se çfarë shkoi keq gjatë procedurës.

Pas incidentit, guvernatori i Tennessee-t, Bill Lee, pezulloi të gjitha ekzekutimet në shtet deri në fund të vitit. Ndërkohë, drejtuesi i sistemit të burgjeve të shtetit njoftoi se do të japë dorëheqjen.

Avokati Ferrell tha se, nëse Pike mbijeton, mund të ketë edhe çështje të tjera ligjore lidhur me gjendjen e saj mendore dhe aftësinë për t’iu nënshtruar një procedure të tillë.

“Nëse ajo shërohet – mund të mos shërohet plotësisht – mund të ketë çështje që lidhen me aftësinë e saj. Ne thjesht nuk dimë asgjë për këtë”, tha ai.

Sipas tij, deri tani nuk ka pasur diskutime me autoritetet për hapat e ardhshëm dhe zyra e Prokurorit të Përgjithshëm të Tennessee-t nuk i ka dhënë mbrojtjes ndonjë sinjal për atë se çfarë synon të bëjë më tej.

Për momentin, gjendja shëndetësore e Pike mbetet kritike dhe nuk ka një afat të qartë se kur mjekët mund të përcaktojnë nëse ajo do të rikuperohet pas procedurës së dështuar. /Telegrafi/