Ministri i Jashtëm i Iranit ka hedhur poshtë pretendimet amerikane se diplomatët iranianë u “dëbuan” nga SHBA-ja pasi refuzuan të largoheshin pas Asamblesë së Përgjithshme të OKB-së në shtator.
“Të gjithë diplomatët iranianë që morën pjesë në Asamblenë e Përgjithshme të OKB-së, me përjashtim të njërit që u largua më herët, u larguan sipas planit”, tha Abbas Araghchi në një postim në platformën X.
Reagimi vjen pasi, sipas raportimeve të mëhershme, Shtetet e Bashkuara kanë “dëbuar” dy anëtarë të delegacionit iranian, të cilët morën pjesë në Asamblenë e Përgjithshme të OKB-së së fundmi, pasi ata shpërfillën urdhrin për t’u larguar nga vendi, njoftoi të shtunën Departamenti i Shtetit.
“Dy anëtarë të tjerë të delegacionit iranian u gjetën ende në (Nju Jork) shumë kohë pasi kishte përfunduar Asambleja e Përgjithshme e Kombeve të Bashkuara. Ata tashmë janë dëbuar nga SHBA-ja”, ka thënë një zyrtar amerikan për AFP-në, duke shtuar se Sekretari i Shtetit, Marco Rubio, “e ka seriozisht”.
Mediat amerikane raportuan se Departamenti i Shtetit i kishte kërkuar ministrit të Jashtëm iranian, Abbas Araghchi, dhe delegacionit të tij të largoheshin nga vendi të hënën, dhe vendosi t’i dëbonte dy anëtarët pasi mësoi nga misioni iranian në OKB se ata kishin qëndruar në vend edhe të premten.
Një anëtar i delegacionit u largua të premten në mbrëmje, ndërsa i dyti u nis të shtunën në mëngjes, sipas Axios.
Zyrtarë amerikanë dhe iranianë ishin takuar një javë më parë në Nju Jork, në margjinat e Asamblesë së Përgjithshme të OKB-së.
Presidenti amerikan Donald Trump e kishte refuzuar një propozim nga Teherani për rihapjen e Ngushticës së Hormuzit, por u tha mediave amerikane se priste që bisedimet të rifillonin në ditët në vijim.
Në anën tjetër, Agjencia shtetërore iraniane e lajmeve IRNA raportoi se Teherani nuk kishte më bisedime të drejtpërdrejta të planifikuara me Uashingtonin. /Telegrafi/
