Kanceri i gjirit nuk shfaqet gjithmonë përmes një gunge të dallueshme. Në disa raste, shenjat e para mund të jenë ndryshime në lëkurë, si skuqje, ënjtje, ndryshim ngjyre ose pamje e ngjashme me lëkurën e portokallit.
Sipas një studimi të ri, deri në 10 për qind e pacienteve diagnostikohen fillimisht për shkak të ndryshimeve të tilla.
Dermatologia Kiran Mian thekson rëndësinë e përfshirjes së dermatologut që në fazat e hershme të trajtimit, për të identifikuar ndryshimet e lëkurës dhe për të krijuar një plan në rast se shfaqen efekte anësore.
Sipas Institutit Kombëtar të Kancerit, shenjat që mund të kërkojnë kontroll mjekësor përfshijnë skuqjen e vazhdueshme të njërit gji, ënjtjen, ngrohtësinë, gropëzat në lëkurë dhe thithkën që kthehet nga brenda.
Një formë e rrallë, por agresive, është kanceri inflamator i gjirit, i cili përbën rreth 1–5 për qind të rasteve. Ai mund të zhvillohet dhe të përhapet më shpejt se format më të zakonshme, ndërsa shpesh nuk krijon një gungë të dallueshme.
Për këtë arsye, mund të ngatërrohet me një infeksion të gjirit ose me një problem të lëkurës, si ekzema.
Onkologja Elizabeth Comen shpjegon se disa paciente paraqiten me ndryshime në lëkurë dhe jo me një gungë të qartë.
Nëse trajtimi fillestar me antibiotikë nuk sjell përmirësim, mjekët mund të rekomandojnë një biopsi për të përcaktuar shkakun. Megjithatë, ndryshimet në lëkurë nuk nënkuptojnë domosdoshmërisht kancer, por ato që janë të reja, vazhdojnë ose nuk largohen duhet të kontrollohen nga mjeku.
Ndryshimet e lëkurës mund të shfaqen edhe si pasojë e trajtimit të kancerit të gjirit. Rrezatimi mund të shkaktojë skuqje, ënjtje, kruajtje dhe errësim të lëkurës, ndërsa kimioterapia mund të sjellë rënie të flokëve.
Studimet tregojnë se më shumë se 70 për qind e pacienteve e konsiderojnë rënien e flokëve efektin anësor më shqetësues. Ftohja e skalpit gjatë kimioterapisë mund të ndihmojë në uljen e këtij efekti, ndaj ekspertët këshillojnë që çdo ndryshim i ri në lëkurë t’i raportohet ekipit mjekësor. /Telegrafi/
