Të paktën pesë palestinezë janë vrarë dhe gjashtë të tjerë janë plagosur rëndë në një sulm ajror izraelit ndaj një ndërtese banimi në qytetin e Gazës, bëjnë të ditur burimet mjekësore.
Sulmi u krye herët të shtunën, pa paralajmërim paraprak, duke shkaktuar shembjen e ndërtesës dhe duke zënë njerëz nën rrënoja teksa ishin në gjumë.
Sipas raportimeve, operacioni i Forcave të Mbrojtjes së Izraelit (IDF) kishte si objektiv Ali al-Amoudin, i cili raportohet se ka pasuar Yahya Sinwarin në krye të Hamasit në Rripin e Gazës.
Operacioni përfshiu përdorimin e helikopterëve sulmues dhe tankeve. Rreth orës 08:00, IDF-ja hapi zjarr ndaj objektivave të dyshimta që ishin afruar pranë “Vijës së Verdhë”.
Burime të sigurisë, të cituara nga Kan News, thanë se Amoudi ndodhej në kompleksin e apartamenteve të goditur dhe se gjasat për mbijetesën e tij ishin “shumë të vogla”. Deri tani nuk është konfirmuar zyrtarisht nëse ai ka mbijetuar apo është vrarë në sulm, shkruan jp.
Amoudi ishte liruar nga një burg izraelit në vitin 2011, në kuadër të marrëveshjes për shkëmbimin e të burgosurve për ushtarin izraelit Gilad Shalit, pasi kishte kaluar afro 20 vjet në burg.
Pas lirimit, ai u zgjodh në Byronë Politike të Hamasit dhe shërbeu si drejtues i zyrës së Yahya Sinwarit. Të dy kishin qenë të burgosur në Izrael dhe u liruan në kuadër të të njëjtit shkëmbim.
Amoudi më pas u bë një nga bashkëpunëtorët më të afërt të Sinwarit dhe, para se të emërohej në krye të Hamasit në Gaza, ishte përgjegjës për aparatin palestinez të propagandës gjatë luftës. /Telegrafi/
