Legjenda braziliane e futbollit, Roberto Carlos, ka rrëfyer se gjatë karrierës së tij humbi deri në 99 përqind të parave që fitonte, duke fajësuar ish-agjentët dhe problemet familjare për vështirësitë e mëdha financiare.
Ish-mbrojtësi i Real Madridit dhe kampioni i botës me Brazilin në vitin 2002 e bëri këtë rrëfim gjatë Samitit të Futbollit të Portugalisë.
“Kisha probleme me njerëz që më lanë pa para. Për shkak të agjentëve dhe problemeve familjare, humba 99 përqind të gjithçkaje që fitoja në futboll”, deklaroi Carlos, sipas Globo.
Braziliani pranoi se kishte bërë gabime dhe paralajmëroi futbollistët e rinj që të jenë shumë më të kujdesshëm me menaxhimin e parave.
“Kam bërë gabime dhe për këtë arsye u kërkoj lojtarëve më të rinj të mos bëjnë të njëjtat gabime”, tha ai.
Carlos tregoi edhe momentin kur kuptoi se situata e tij financiare ishte shumë më serioze nga sa mendonte.
“Të enjten shkova në shtrat në mesnatë dhe të premten mora një mori dokumentesh që as nuk e dija se ekzistonin. Pastaj humba të gjithë historinë time”, rrëfeu ai.
Pavarësisht vështirësive, Carlos arriti të qëndrojë i përfshirë në futboll dhe sot punon si ambasador i Real Madridit. Ai tha se kishte menduar për jetën pas futbollit që gjatë karrierës së tij.
“Gjithmonë kam menduar se si do të jetë pas karrierës sime. Kjo do të thotë të ndërtoj një trashëgimi si lojtar dhe të përdor imazhin tim”, përfundoi legjenda braziliane./Telegrafi/
