Shkaku i vdekjes së Hayden Panettiere është konfirmuar zyrtarisht, një muaj pasi aktorja ndërroi jetë në moshën 36-vjeçare.
Panettiere vdiq më 16 gusht në një banesë në Greenville, Karolina e Jugut, ndërsa autoritetet kishin dyshuar fillimisht për një “mbidozë” të drogës.
Ish-partneri i saj, Brian Hickerson, me të cilin kishte pasur një marrëdhënie herë pas here, dhe vëllai i tij, Zach, ndodheshin të dy në vendngjarje kur Panettiere u shpall e vdekur.
Tani, një zëdhënës i Zyrës së Mjekut Ligjor të Qarkut Greenville ka konfirmuar për “Daily Mail” se Panettiere ndërroi jetë si pasojë e “efekteve toksike” të disa substancave, përfshirë fentanilin, dhe se vdekja e saj është cilësuar si aksidentale.
Vetëm disa grimca të fentanilit, një opioid shumë i fuqishëm që është rreth 50 herë më i fortë se heroina, mund të shkaktojnë një mbidozë fatale.
“U krye një autopsi nga një patolog mjeko-ligjor i certifikuar nga bordi. Gjatë autopsisë nuk u zbuluan shenja traume që do të kishin ndikuar në vdekjen e saj.
Shkaku i vdekjes është përcaktuar si efektet toksike të fentanilit, 4-ANPP, alprazolamit, metokarbamolit dhe kvetiapinës. Mënyra e vdekjes është përcaktuar si aksidentale.
Ky rast është mbyllur administrativisht nga Zyra e Mjekut Ligjor të Qarkut Greenville.”
Metokarbamoli është një relaksues muskulor që merret me recetë dhe përdoret për trajtimin afatshkurtër të dhimbjeve muskulore.
Ndërsa kvetiapina, e njohur zakonisht me emrin tregtar Seroquel, është një medikament antipsikotik që merret me recetë dhe përdoret për trajtimin e disa gjendjeve, përfshirë skizofreninë, çrregullimin bipolar dhe depresionin madhor.
