Evropa ka nevojë për një mekanizëm të ri emergjent të sigurisë, të ngjashëm me funksionin e Nenit 4 të NATO-s, për t’iu përgjigjur më shpejt kërcënimeve hibride dhe veprimeve destabilizuese të Rusisë, deklaroi presidentja e Komisionit Evropian, Ursula von der Leyen.
Gjatë fjalimit të saj, pasi trajtoi tema si tregtia, inteligjenca artificiale dhe ndryshimet klimatike, von der Leyen iu rikthye situatës së sigurisë në Evropë dhe rasteve të fundit që ajo i cilësoi si pjesë të rritjes së kërcënimeve hibride.
Ajo përmendi përplasjen e kësaj jave mes një helikopteri danez dhe një fregate ruse në Detin Baltik, rrëzimin e një droni mbi hapësirën ajrore të Lituanisë, si dhe rastin e një personi të dyshuar si spiun rus, i cili sipas autoriteteve është lidhur me një sulm me dron në Leipzig muajin e kaluar.
Von der Leyen paralajmëroi se Evropa nuk duhet ta nënvlerësojë situatën, transmeton Telegrafi.
“Nuk duhet të kemi asnjë iluzion për atë që po ndodh këtu: kërcënimet hibride me të cilat përballet Evropa janë gjithnjë e më pak hibride dhe gjithnjë e më pak vetëm kërcënime”, tha ajo.
Sipas presidentes së Komisionit Evropian, sabotazhi kibernetik, zjarrvëniet dhe inkursionet e dronëve po shtohen vazhdimisht.
Ajo argumentoi se, në të njëjtën kohë me rritjen e këtyre incidenteve, duhet të rritet edhe gatishmëria e vendeve evropiane për t’u përballur me to.
Von der Leyen propozoi krijimin e një “manuali kundër kërcënimeve hibride”, i cili do të përcaktonte një qasje të përbashkët evropiane për mënyrën se si duhet të reagojnë shtetet anëtare ndaj incidenteve të tilla.
Ajo tha se ky mekanizëm do të shërbente si një strukturë që plotëson mekanizmat ekzistues të NATO-s, veçanërisht Nenin 4.
“Me fjalë të tjera, na nevojitet një mekanizëm që ta plotësojë Nenin 4 të NATO-s. Besoj se ka ardhur koha për një nen të vetin të Evropës, për një protokoll emergjent të sigurisë”, deklaroi von der Leyen.
Sipas propozimit të saj, nëse një shtet anëtar do ta aktivizonte këtë mekanizëm për shkak të një incidenti serioz të sigurisë, të gjitha vendet anëtare do të duhej të mblidheshin për të diskutuar situatën dhe reagimin e përbashkët.
Neni 4 i Traktatit të NATO-s u lejon vendeve anëtare të kërkojnë konsultime me aleatët kur njëri prej tyre konsideron se siguria, integriteti territorial ose pavarësia politike e tij është e kërcënuar.
Aktivizimi i Nenit 4 nuk nënkupton automatikisht përdorimin e forcës ushtarake. Ai shërben si mekanizëm konsultimi politik dhe sigurie mes aleatëve.
Propozimi i von der Leyen synon që Evropa të ketë një mekanizëm të ngjashëm për reagim dhe koordinim të shpejtë ndaj kërcënimeve hibride, në një kohë kur incidentet me dronë, sabotazhi dhe aktivitetet e dyshuara ruse po marrin një rëndësi gjithnjë e më të madhe në debatin evropian të sigurisë. /Telegrafi/
