Barcelona ka bërë një ofertë veçanërisht të fortë për të nënshkruar me talentin e akademisë së Manchester United, JJ Gabriel, raporton Manchester Evening News.
15-vjeçari ka tronditur klubin anglez duke kërkuar ndërprerjen e menjëhershme të regjistrimit të tij dhe largimin nga Manchester United.
Klubi anglez ende nuk ka hequr dorë nga shpresat për ta bindur talentin të qëndrojë dhe insiston se nuk mund ta çregjistrojë atë para përfundimit të sezonit.
Megjithatë, Gabriel refuzoi të stërvitej të martën, duke bërë që Manchester United të anulojë planin për t’i dhënë atij debutimin me ekipin e parë të mërkurën mbrëma, në ndeshjen e Carabao Cup ndaj Brightonit.
Falë pasaportës irlandeze, 15-vjeçari do të kishte të drejtë të transferohej te një klub evropian nëse arrin ta ndërpresë përfundimisht lidhjen me Manchester United. Për të ka interesim nga disa prej klubeve më të mëdha të Evropës, por Barcelona duket se është veçanërisht e interesuar për shërbimet e tij.
Gabriel shkëlqeu sezonin e kaluar, duke shënuar 26 gola në 29 ndeshje me ekipin U18 të Manchester United në Premier League U18 dhe FA Youth Cup.
Edhe këtë sezon, talenti i madh ka vazhduar të impresionojë, pasi tashmë ka realizuar tri gola me ekipin U21./Telegrafi/
