“Camp Nou” mund të jetë skena e finales së Ligës së Kampionëve në vitin 2029, teksa UEFA pritet të marrë vendimin për stadiumin pritës gjatë kësaj të marte në Selanik të Greqisë.
Për finalen e Ligës së Kampionëve të vitit 2029 janë paraqitur zyrtarisht dy kandidatura: “Spotify Camp Nou” i Barcelonës dhe “Wembley” i Londrës.
Sipas raportimeve, stadiumi katalanas shihet si favorit për të fituar të drejtën e organizimit të ndeshjes më të rëndësishme të futbollit evropian.
Kandidatura e Barcelonës mbështetet nga Barcelona, Bashkia e Barcelonës, Generalitat de Catalunya, Federata Spanjolle e Futbollit dhe qeveria e Spanjës.
UEFA është në dijeni të ecurisë së punimeve në “Camp Nou”. Instalimi i çatisë së re është planifikuar për verën e vitit 2027, ndërsa punimet përfundimtare pritet të përmbyllen në fillim të vitit 2028, në skenarin maksimal.
Pas përfundimit të plotë të rikonstruksionit, stadiumi pritet të bëhet sërish një prej impianteve më të mëdha sportive në Evropë, me një kapacitet të planifikuar prej 104.600 spektatorësh, përfshirë rreth 9.400 vende VIP.
Ky kapacitet do ta vendoste “Camp Nou” përpara “Wembley”-t, i cili aktualisht ka rreth 90.000 vende.
Sipas vlerësimeve të UEFA-s, Barcelona ka një avantazh të rëndësishëm jo vetëm për shkak të kapacitetit të stadiumit, por edhe të infrastrukturës së qytetit. Numri i madh i kapaciteteve hoteliere dhe aeroporti ndërkombëtar i Barcelonës konsiderohen pika të forta të kandidaturës katalanase.
Për UEFA-n, organizimi i një finaleje në një stadium me më shumë se 100 mijë vende përbën një tërheqje të veçantë, sidomos duke pasur parasysh kërkesën e lartë për bileta për finalen e Ligës së Kampionëve.
Fakti që finalja e vitit 2027 do të zhvillohet në stadiumin “Metropolitano” të Madridit nuk shihet si pengesë për rikthimin e finales në Spanjë vetëm dy vite më vonë.
Ndërkohë, finalja e vitit 2028 pritet të zhvillohet në “Allianz Arena” të Mynihut, i cili është kandidati i vetëm për atë edicion.
“Camp Nou” ka pritur dy finale të paharrueshme
Stadiumi i Barcelonës ka një histori të rëndësishme me finalet e kompeticionit më prestigjioz evropian.
Në vitin 1989, “Camp Nou” priti finalen ku Milani mposhti Steaua Bukureshtin me rezultat të thellë 4-0.
Dhjetë vjet më vonë, në vitin 1999, stadiumi katalanas ishte skena e një prej finaleve më dramatike në historinë e Ligës së Kampionëve. Manchester United përmbysi Bayern Munichun me dy gola në minutat shtesë dhe fitoi 2-1.
Një tjetër finale e Ligës së Kampionëve në “Camp Nou” do të rikthente një prej ngjarjeve më të mëdha sportive në stadiumin e rinovuar të Barcelonës.
Në mbledhjen e Komitetit Ekzekutiv në Selanik do të përcaktohen gjithashtu stadiumet pritëse për një sërë finaleshe të tjera evropiane.
Ndër vendimet që pritet të merren janë stadiumet për Superkupën e UEFA-s për vitet 2027 dhe 2028, si dhe për fazën finale të Ligës së Kampionëve në futsall për vitin 2027.
Në Selanik do të merret gjithashtu një vendim për stadiumin që do të presë finalen e Ligës së Kampionëve për femra në vitin 2028.
“San Mames” në Bilbao është një prej kandidatëve, pas suksesit të madh të finales së vitit 2024, kur Barcelona mposhti Lyonin 2-0 përpara 50.827 spektatorëve.
Stadiumi bask, me një kapacitet prej rreth 53.331 vendesh, konkurron me “Groupama Stadium” të Lyonit, “St. Jakob-Park” të Bazelit dhe “RAMS Park” të Stambollit, stadiumi i Galatasarayt.
Ndërkohë, finalja e Ligës së Kampionëve për femra në vitin 2027 do të zhvillohet në Stadiumin Kombëtar të Varshavës, në Poloni. /Telegrafi/
