Një goditje për Shtëpinë e Bardhë: Gjykata Supreme e Shteteve të Bashkuara ka refuzuar përkohësisht planin e presidentit Donald Trump për vendosjen e kufizimeve të reja mbi votimin me postë, përpara zgjedhjeve të nëntorit.
Gjykatësit mbështetën vendimin e një gjyqtari federal, i cili kishte bllokuar përkohësisht Shërbimin Postar të SHBA-së (USPS) që të zbatonte kërkesat e reja për fletëvotimet e dërguara me postë.
Megjithatë, vendimi nuk pritet të jetë përfundimtar. Gjykatësi konservator Brett Kavanaugh votoi në favor të vendimit, por la të hapur mundësinë që në një fazë të mëvonshme të mbështesë administratën Trump, ndërsa beteja ligjore vazhdon.
Trump kishte argumentuar se rregullat e reja synonin të luftonin mashtrimet zgjedhore. Në mars, ai nënshkroi një urdhër ekzekutiv që udhëzonte USPS-in të dërgonte fletëvotime vetëm te votuesit që figurojnë në lista të qytetarëve.
Por kundërshtarët ligjorë argumentuan se masa cenon të drejtat kushtetuese të shteteve për të administruar zgjedhjet, transmeton Telegrafi.
Në opinionin e tij, Kavanaugh shkroi se ekziston “të paktën një mundësi e arsyeshme” që rregullat përfundimtare të jenë brenda autoritetit ligjor të Shërbimit Postar.
Megjithatë, ai argumentoi se zbatimi i tyre në zgjedhjet e vitit 2026 do të ishte “arbitrar dhe kapriçioz”, duke lënë kështu të hapur një ndryshim të mundshëm të qëndrimit në fazat e ardhshme të procesit gjyqësor.
Dy gjyqtarë të tjerë konservatorë, Samuel Alito dhe Clarence Thomas, kundërshtuan vendimin. Ata e cilësuan padinë kundër urdhrit të Trumpit si një përpjekje të dëshpëruar, që sipas tyre ka pak gjasa të ketë sukses përfundimisht.
“Shërbimi Postar ka autoritet të gjerë për të rregulluar postën”, shkruan ata.
Shtëpia e Bardhë nuk ka komentuar menjëherë vendimin. Rreth 30 për qind e votuesve amerikanë, kryesisht demokratë, votuan me postë në zgjedhjet e përgjithshme të zhvilluara dy vjet më parë.
Që prej rikthimit në Shtëpinë e Bardhë, Trump ka kërkuar të kufizojë votimin me postë. Edhe pse vetë ka votuar me postë, presidenti prej kohësh pretendon se kjo mënyrë votimi mund t’u mundësojë joqytetarëve të votojnë dhe se është e ekspozuar ndaj mashtrimeve.
Urdhri i marsit kërkonte gjithashtu që USPS të vendoste barkode unike në zarfet e fletëvotimeve, ndërsa autoritetet zgjedhore shtetërore dhe lokale do të duhej të siguronin në një portal online të dhëna për votuesit që marrin fletëvotime me postë.
Në total, 23 shtete dhe Distrikti i Kolumbias ngritën padi për ta bllokuar urdhrin presidencial.
Edhe sindikata e punonjësve postarë kundërshtoi masat, duke argumentuar se punonjësit nuk mund të trajnoheshin në kohë përpara zgjedhjeve.
Administrata Trump ka mbrojtur në gjykatë ligjshmërinë kushtetuese të rregullave të reja. Sipas saj, shtetet nuk mund të përdorin shërbimin postar federal për zhvillimin e zgjedhjeve dhe më pas të pretendojnë se posta e lidhur me zgjedhjet është e përjashtuar nga autoriteti rregullator i USPS-it.
Më 4 shtator, gjyqtarja federale në Boston, Indira Talwani, lëshoi një urdhër që bllokonte zbatimin e masave të Trumpit. Ajo argumentoi se vendosja e ndryshimeve kaq pranë zgjedhjeve të nëntorit mund t’u mohonte disa votuesve mundësinë për të votuar.
Javën e kaluar, një gjykatë federale apeli refuzoi ta pezullonte vendimin e Talwanit.
Të dielën, një tjetër gjyqtar federal, Carl Nichols, gjithashtu vendosi kundër urdhrit të Trumpit.
Disa shtete kanë nisur tashmë shpërndarjen e fletëvotimeve me postë për zgjedhjet e nëntorit, të cilat do të përcaktojnë se cila parti do të kontrollojë Kongresin amerikan.
Ky nuk është rasti i parë këtë vit që Trump pëson një pengesë në Gjykatën Supreme lidhur me votimin me postë.
Në qershor, gjykatësit vendosën se shtetet mund të numërojnë edhe fletëvotimet që mbajnë vulën postare të ditës së zgjedhjeve, duke rrëzuar përpjekjen e administratës Trump për të ndaluar numërimin e votave që mbërrijnë pas mbylljes së qendrave të votimit.
Trump, ndërkohë, ka bërë më herët pretendime të pavërteta se humbja e tij në zgjedhjet presidenciale të vitit 2020 ishte rezultat i mashtrimeve të përhapura zgjedhore. /Telegrafi/
