Shkolla Fillore „Naim Frashëri“ në Bujanoc ka lëshuar një njoftim zyrtar për të gjithë nxënësit e klasave të teta dhe prindërit e tyre, duke zbardhur datat dhe rregullat e provimeve përfundimtare të cilat nisin këtë të hënë.
Provimet, të cilat janë obligative për të gjithë nxënësit që përfundojnë ciklin fillor, do të shtrihen në tre ditë radhazi, duke filluar nga data 15 qershor 2026.
Kalendari i plotë i testimeve:
- 15.06.2026 (E hënë): Provimi nga lënda e Gjuhës Shqipe
- 16.06.2026 (E martë): Provimi nga lënda e Matematikës
- 17.06.2026 (E mërkurë): Testi i zgjedhur (lënda zgjedhore)
Mobilizim i hershëm: Nxënësit në shkollë që nga ora 08:00
Sipas udhëzimeve të menaxhmentit të shkollës, të gjitha provimet do të startojnë zyrtarisht në ora 09:00. Megjithatë, për shkak të procedurave të rregullta dhe mbarëvajtjes së procesit, nxënësit janë të obliguar të paraqiten në ambientet e shkollës një orë më herët, saktësisht në ora 08:00.
Drejtoria e shkollës u ka bërë thirrje prindërve dhe nxënësve për vëmendje maksimale ndaj këtij orari:
”Lusim nxënësit që të jenë të përgatitur dhe të respektojnë orarin e përcaktuar. Pjesëmarrja në provime është obligative për të gjithë,” thuhet në njoftimin e shkollës, ku në fund përcillen edhe urimet më të mira për suksesin e gjysmëmaturantëve./BujanociNet/
