Një incident i rëndë është shënuar në orët e para të mëngjesit në fshatin Breznicë, ku një person i armatosur ka hyrë në një kazino dhe ka shkaktuar të shtëna me armë zjarri.
Sipas raportimeve të publikuara nga Presheva.com, një person i maskuar, i pajisur me armë automatike, ka hyrë në ambientet e lokalit dhe ka kërkuar një shumë të konsiderueshme parash nga punonjësi.
Pasi nuk ka arritur të sigurojë paratë, i dyshuari ka qëlluar disa herë brenda kazinosë, duke shkaktuar dëme materiale në pajisjet e lojërave të fatit.
Fatmirësisht, nga ky incident nuk raportohet për persona të lënduar.
Në vendin e ngjarjes kanë dalë menjëherë njësitë policore dhe organet hetuese, të cilat kanë nisur hetimet për zbardhjen e rastit.
Prokuroria e Lartë Publike në Vranjë ka konfirmuar se është hapur rast dhe se po ndërmerren veprime intensive për identifikimin dhe kapjen e autorit.
Ngjarja ka shkaktuar shqetësim në Bujanoc, ndërsa autoritetet vijojnë hetimet për sqarimin e plotë të rrethanave.
