Ministri për Evropën dhe Punët e Jashtme të Shqipërisë, Ferit Hoxha, ka theksuar rëndësinë e respektimit të plotë të të drejtave të shqiptarëve në Luginën e Preshevës, gjatë një takimi me ambasadorin e Serbisë në Shqipëri.
Në një deklaratë për mediat pas këtij takimi, Hoxha nënvizoi nevojën që të drejtat e shqiptarëve në Preshevë, Bujanoc dhe Medvegjë të garantohen dhe të zbatohen në mënyrë efektive, në përputhje me legjislacionin kombëtar të Serbisë dhe standardet ndërkombëtare. Ai theksoi se kjo duhet të shoqërohet edhe me politika konkrete për zhvillim të qëndrueshëm dhe gjithëpërfshirës socio-ekonomik në këtë rajon.
Ministri bëri të ditur se çështja e të drejtave të shqiptarëve në Luginën e Preshevës do të mbetet një ndër prioritetet kryesore të angazhimit të tij diplomatik. Sipas tij, adresimi i kësaj teme në mënyrë konstruktive është thelbësor për ndërtimin e besimit të ndërsjellë dhe për forcimin e marrëdhënieve të mira fqinjësore mes Shqipërisë dhe Serbisë.
Deklarata e Hoxhës vjen në një kohë kur marrëdhëniet rajonale dhe çështjet e të drejtave të pakicave vijojnë të jenë në fokus të dialogut politik dhe diplomatik në Ballkanin Perëndimor./BujanociNet/
