Presidenti amerikan Donald Trump i ka bërë presion Koresë së Jugut që të nënshkruajë sa më shpejt pjesëmarrjen në një projekt prej 50 miliardë dollarësh për gazin natyror të lëngshëm (LNG) në Alaska, duke paralajmëruar se Seuli mund të paguajë “dyfish” nëse nuk e finalizon marrëveshjen.
“Nëse nuk duan ta bëjnë, për mua është në rregull. Thjesht do t’u marr më shumë”, u tha Trump gazetarëve të premten, sipas Shtëpisë së Bardhë. “Thuajuni se nëse nuk nënshkruajnë së shpejti, do ta dyfishoj.”
Trump nuk sqaroi se çfarë do të dyfishohej. Mediat e Koresë së Jugut kanë ngritur mundësinë se ai mund t’u jetë referuar tarifave më të larta doganore ndaj produkteve koreano-jugore, transmeton Telegrafi.
Deklaratat e presidentit amerikan vijnë mes një mospërputhjeje mes Uashingtonit dhe Seulit lidhur me investimet energjetike dhe infrastrukturore të Koresë së Jugut në SHBA. Trump ka njoftuar disa projekte si pjesë të marrëveshjeve dypalëshe, ndërsa autoritetet koreano-jugore kanë sqaruar se disa prej tyre ende nuk janë finalizuar.
I pyetur nëse e kishte bërë njoftimin për pjesëmarrjen e Koresë së Jugut në projektin LNG të Alaskës para kohe, Trump tha se “nuk kishte nxituar”.
Seuli ka deklaruar se ende po e vlerëson projektin dhe se çdo pjesëmarrje do të varet nga fizibiliteti komercial dhe respektimi i procedurave ligjore në Korenë e Jugut.
Ndërkohë, Trump njoftoi të premten në rrjetin e tij Truth Social se marrëveshja e investimeve me Korenë e Jugut “po bëhet gjithnjë e më e mirë”, duke shtuar një projekt prej 8.4 miliardë dollarësh për rritjen e nxjerrjes së naftës.
Teknologjia e rikuperimit të avancuar të naftës përdor metoda të ndryshme, përfshirë injektimin e dioksidit të karbonit, për të rritur sasinë e naftës së nxjerrë nga një vendburim.
Megjithatë, mediat koreano-jugore raportuan se edhe ky projekt nuk ishte pjesë e marrëveshjeve të arritura mes Seulit dhe Uashingtonit. Sipas ministrisë së industrisë së Koresë së Jugut, autoritetet po përpiqeshin të verifikonin njoftimin e Trumpit dhe kishin kontaktuar palën amerikane përmes kanaleve tregtare për sqarime.
Mospërputhjet rreth projekteve të investimeve tregojnë se, pavarësisht njoftimeve publike nga Trump, disa prej marrëveshjeve mes dy vendeve ende mund të jenë në fazën e shqyrtimit dhe finalizimit. /Telegrafi/
