Shpesh shohim forma të njohura te retë, si fytyra apo kafshë.
Ky fenomen quhet pareidoli, kur truri dallon modele të njohura në objekte të rastësishme.
Por në disa raste, ajo që duket si një valë oqeani në qiell është krejtësisht reale.
Bëhet fjalë për retë Kelvin-Helmholtz, një nga formacionet më të rralla dhe më spektakolare të atmosferës.
Së fundmi, disa fotografi të këtij fenomeni të publikuara në rrjete sociale u bënë virale, me mijëra reagime.
Një përdorues i përshkroi pamjet thjesht si “oqean në re”.
Këto re janë emërtuar sipas shkencëtarëve Lord Kelvin dhe Hermann von Helmholtz, të cilët studiuan procesin fizik që shkakton formimin e tyre.
Fenomeni shfaqet kur dy shtresa ajri lëvizin me shpejtësi të ndryshme. Zakonisht, një shtresë ajri e ftohtë dhe më e dendur ndodhet poshtë një shtrese më të ngrohtë e më të lehtë, e cila lëviz më shpejt.
Kur shtresa e sipërme kalon mbi atë të poshtme, krijohet një paqëndrueshmëri që e përkul dhe e rrotullon renë, duke formuar kreshta që duken si valë deti.
Formimi i këtyre reve kërkon kushte shumë specifike dhe ato zakonisht zhduken shpejt.
Për këtë arsye, fotografimi i tyre është një rast i rrallë.
Retë Kelvin-Helmholtz mund të jenë më shumë se një pamje spektakolare. Sipas Met Office të Mbretërisë së Bashkuar, ato shpesh shfaqen në ditë me erë të fortë dhe mund të jenë tregues të turbulencave të avionëve.
Erërat që krijojnë këto formacione mund të shkaktojnë turbulenca të forta edhe në zona ku ato nuk janë të dukshme.
Për këtë arsye, pilotët përpiqen t’i shmangin shtresat e ajrit ku shfaqet ky fenomen. /Telegrafi/
