Një “tërmet” i vërtetë politik ka goditur themelet e koalicionit qeverisës në Bujanoc gjatë seancës së sotme të Kuvendit Komunal, duke e çuar pushtetin lokal në pikën më kritike të ekzistencës, ku çdo votim i radhës mund të nënkuptojë rënien e tij.
Siç raporton zyrtarisht portali informativ “Bujanovaçke”, me propozim të Kryetarit të Komunës, Arbër Pajaziti, shumica parlamentare ka shkarkuar nga pozita e anëtares së Këshillit Komunal, Marijana Stojanoviqin. Në vend të saj është emëruar Jelena Zafiroviq.
Ky vendim ka shpërfaqur një përçarje të madhe dhe publike brenda Grupit të Qytetarëve të dr. Dejan Stojanoviq – Meçes, i cili në total numëron 5 këshilltarë. Megjithatë, informacionet e fundit nga terreni tregojnë se brenda këtij grupi, dr. Meçe po e ruan shumicën e besnikëve, gjë që e bën situatën e pushtetit akoma më alarmante. Rreshtimi i saktë i këshilltarëve të tij është ky:
Tre këshilltarë kanë marrë pjesë në seancë (përfshirë Stefan Stošić dhe Dalibor Tasić), duke votuar pro dhe duke u bërë “shpëtimtarët” e koalicionit në këtë seancë.
Një këshilltar ka munguar për shkaqe shëndetësore (i sëmurë), por që sipas informacioneve tona qëndron plotësisht në krahun e dr. Meçes.
Vetë lideri, dr. Dejan Stojanoviq – Meçe, ka zgjedhur bojkotin total duke mos marrë pjesë fare në mbledhje.
Ky fakt dëshmon se pushteti ka arritur të marrë vetëm 3 vota nga ky grup, ndërsa blloku tjetër i dr. Meçes ka kaluar hapur në opozitë. Si rrjedhojë e kësaj matematike të brishtë, të gjitha vendimet jetike po kalojnë me saktësisht 21 vota pro – që përbën minimumin e rreptë ligjor të lejueshëm për një Kuvend si ai i Bujanocit që ka 41 këshilltarë. Nëse vetëm këta 3 këshilltarë nuk do të votonin, pushteti do të zbriste në 18 vota, gjë që do të thoshte fund i menjëhershëm i shumicës qeverisëse.
Në një deklaratë të parë të dhënë për “Bujanovaçke”, ish-anëtarja e Këshillit Komunal, Marijana Stojanoviq, është shprehur e befasuar nga ky shkarkim dhe ka paralajmëruar një njoftim të detajuar për opinionin publik. Ndërkaq, dr. Meçe përmes një shkrese zyrtare ka akuzuar partnerët për përjashtim të grupit të tij nga vendimmarrjet kryesore, siç ishte hartimi i buxhetit të vitit 2026.
Ky votim me vetëm 21 vota ndez alarmin e kuq për pushtetin lokal në Bujanoc. Nga sot, stabiliteti i qeverisjes është thyer plotësisht dhe pushteti varet tërësisht nga prania dhe “humori” i secilit këshilltar në salla. Me rreshtimin e ri ku dr. Meçe kontrollon pjesën tjetër të grupit, mungesa, sëmundja apo ndryshimi i mendimit i qoftë edhe një personi të vetëm në seancat e radhës do të çonte automatikisht në bllokim të institucioneve dhe krizë totale politike në komunë./BujanociNet/
