Ministri i Jashtëm francez, Jean-Noel Barrot, ka përjashtuar heqjen e sanksioneve ndaj Iranit, për sa kohë që Ngushtica e Hormuzit mbetet e bllokuar nga forcat e tij të armatosura.
“Ne vetë kemi vendosur sanksione të rëndësishme ndaj Iranit. Por është jashtë diskutimit që çdo sanksion të hiqet për sa kohë që Ngushtica e Hormuzit mbetet e bllokuar”, tha Barrot për transmetuesin francez RTL.
“Ajo nuk mund të bllokohet, t’i nënshtrohet taksave ose të përdoret si levë ose shantazh”, shtoi Barrot, transmeton Telegrafi.
“Franca duhet të sigurojë që të mos e gjejë veten më kurrë në një situatë ku detyrohet të paguajë çmimin për luftërat që nuk zgjodhi të nisë”, shtoi ministri francez.
“Kjo është arsyeja pse ne duhet të përqendrohemi në … se si Evropa mund të heqë qafe të gjitha këto varësi nga hidrokarburet dhe nafta – duke mos qenë më e varur nga nafta, duke mos qenë më e varur nga teknologjitë digjitale. Shkurt, duke mos qenë më e varur nga gjërat që, në një mënyrë ose në një tjetër, na tërheqin në konflikte, fatkeqësi dhe kriza në të cilat nuk jemi pjesëmarrës”, theksoi për fund Barrot. /Telegrafi/
