Sportistët olimpikë janë mobilizuar në mënyrë masive kundër një reklame për baste sportive, ku shfaqet aktorja Sydney Sweeney në poza me shumë pak ose aspak veshje, ndërsa në të njëjtën kohë sportistet kanë zgjedhur të tregojnë aftësinë, forcën dhe bukurinë e vërtetë të sportit të femrave.
Fushata reklamuese, e realizuar për kompaninë amerikane të tregut të parashikimeve sportive Novig, e paraqet Sweeney-n me shumë pak ose aspak rroba, teksa shtiret sikur luan disa sporte të ndryshme.
Reklama është kritikuar gjerësisht për seksualizimin e sportit të femrave. Ish-notarja olimpike Ariarne Titmus tha se mendonte se kjo lloj mënyre marketingu i përkiste së kaluarës.
“E kam të pamundur të përshkruaj se sa e tërbuar ndihem kur e shoh këtë”, shkroi katër herë fituesja e medaljes së artë olimpike në Instagram.
“Jo vetëm që është një goditje në fytyrë për çdo grua që i është përkushtuar gjithë jetën përsosjes së aftësive të saj, por edhe për çdo grua që e shijon sportin për atë që është në të vërtetë – puna në ekip, miqësia, përkushtimi, përsosmëria, bashkimi…
“Si është e mundur që jetojmë në një botë ku monetizimi i trupit të gruas dhe seksualizimi i sportit të femrave vazhdojnë të jenë ende një realitet?”
Reagimi i sportisteve ka qenë i menjëhershëm. Ato jo vetëm që e kanë dënuar reklamën, por e kanë shfrytëzuar këtë rast për të nxjerrë në pah nivelin e jashtëzakonshëm të sportit të femrave.
Duke marrë frymëzim nga gjimnastja amerikane Gracie Kramer, e cila nisi një trend reagimesh me frazën “kështu duket një grua në sport”, notarja olimpike australiane Lani Pallister publikoi një video në Instagram ku shfaqte stërvitjet e saj, garat dhe medaljet që ka fituar.
Edhe sprinterja Bree Rizzo publikoi një përmbledhje të momenteve më të rëndësishme të karrierës së saj në pistë, ndërsa versioni i publikuar nga Australian Institute of Sport përfshinte pamje nga harkëtaria, gjimnastika, boksi, softballi, si dhe momente nga prapaskenat që tregonin shkencën sportive në veprim në mbështetje të sportit të femrave.
Tilly Kearns, fituese e medaljes së argjendtë olimpike në vaterpol, shkroi: “E urrej absolutisht reklamën e re sportive të Sydney Sweeney”, ndërsa kampionia e botës në boks, Skye Nicolson, tha se reagimi kundër reklamës kishte të bënte me faktin se ajo e kthente në tallje sportin e femrave, dhe jo me mënyrën se si duken gratë.
“Ka një ndryshim të madh mes të dukurit ‘seksi’ sepse merresh me sport dhe përdorimit të seksit për të shitur ‘sportin’”, shkroi ajo në një postim në Instagram.
“Nuk ka asgjë të keqe të dukesh bukur dhe të merresh me sport, dhe nuk ka asgjë të keqe të përqafosh feminilitetin tënd, duke qenë njëkohësisht edhe një sportiste e fuqishme dhe e zonja.”
