Elon Musk ka reaguar ashpër ndaj regjisorit të një dokumentari katërorësh për jetën dhe ndikimin e tij, duke e cilësuar Alex Gibney-n si një “plak të hidhëruar” që “nuk ka aspak integritet”.
Gibney, i cili më herët ka realizuar dokumentarë për rrëzimin e kompanisë Enron, WikiLeaks dhe Vladimir Putin, prezantoi premierën e dokumentarit të tij për Musk në Festivalin e Filmit në Venecia këtë javë. Regjisori tha se beson se njeriu më i pasur në botë është “jashtëzakonisht i rrezikshëm”.
Në një seri postimesh në X, platformën që Musk bleu për 44 miliardë dollarë në vitin 2022, miliarderi i teknologjisë e kritikoi ashpër dokumentarin, duke e quajtur një “sulm që nuk godet në shenjë”. Ai shtoi se kohëzgjatja prej katër orësh e bën dokumentarin, i cili është shumë kritik ndaj tij, “jashtëzakonisht të mërzitshëm”.
Musk gjithashtu duket se përforcoi një teori konspirative, duke ripostuar një imazh ku Partia Demokratike paraqitej si një kukull që kontrollonte një tjetër kukull me etiketën “Team Soros”, në referencë të miliarderit George Soros, i cili ka mbështetur kauza progresiste.
Kjo kukull, nga ana tjetër, kontrollonte një tjetër me emrin “Alex Gibney”, ndërsa kukulla e Gibney-t kontrollonte një tjetër të etiketuar “Hollywood”. Në përgjigje të imazhit, Musk shkroi: “E saktë.”
Kur një mbështetës i tij tha se nuk kishte dëgjuar kurrë për Gibney-n deri në realizimin e dokumentarit për Musk, miliarderi u përgjigj: “Është një operacion psikologjik” — duke iu referuar një “operacioni psikologjik” të planifikuar për të ndikuar në mënyrën se si mendon publiku.
“Gibney nuk ka aspak integritet. Zero”, shkroi Musk. “Fatmirësisht, filmat e tij janë jashtëzakonisht të mërzitshëm… Është një sulm që nuk godet në shenjë dhe bën mëkatin fatal të të qenit i mërzitshëm për katër orë.”
“Gibney thjesht ka mbledhur një listë njerëzish që ose kanë inate personale, ose as nuk më njohin, por prapëseprapë kanë diçka kundër meje… Është një plak i mbushur me mllef, që e ka humbur drejtimin shumë kohë më parë.”
“Edhe plehu meriton më shumë respekt se Gibney”, shtoi Musk.
Dokumentari ka shkaktuar reagime që prej premierës së tij, ashtu si edhe pretendimet e bëra nga disa prej personave të përfshirë në film.
Musk mohoi në mënyrë të veçantë pretendimin e ish-partneres së tij, ish-influencueses së MAGA-s, Ashley St. Clair, se ekipi i tij i kishte ofruar 40 milionë dollarë për të nënshkruar një marrëveshje konfidencialiteti lidhur me marrëdhënien e tyre.
“Ajo nuk është ofruar kurrë me një shumë të tillë dhe ka një histori pretendimesh të rreme”, shkroi Musk.
Musk gjithashtu shpërndau një postim të podkasteres Katie Miller, bashkëshortja e këshilltarit me ndikim të Donald Trump, Stephen Miller, dhe ish-drejtoreshë e komunikimit në Departamentin e Efiçencës së Qeverisë, të drejtuar nga Musk.
Miller kritikoi mungesën e pretenduar të miqve, bashkëpunëtorëve dhe aleatëve të Musk në dokumentar.
“Thjesht nuk mund të quhet ‘përfundimtar’ nëse njerëzit që ishin aty nuk kanë marrë pjesë”, tha ajo. “Ky film fiktiv është një sulm i qëllimshëm nga një regjisor hollivudian i obsesionuar pas vetes.”
Ndikimi i Musk në diskursin publik përmes X dhe përmbajtjes që platforma favorizon po shkakton jehonë edhe në arenën ndërkombëtare.
Ndërsa ai ka ndërhyrë vazhdimisht në debatin mbi emigracionin në Mbretërinë e Bashkuar, Musk gjithashtu përshëndeti rezultatin e fortë të partisë së ekstremit të djathtë në Gjermani, Alternative für Deutschland (AfD), në zgjedhjet rajonale të kësaj jave në Saksoni-Anhalt.
