Ndalohen për 48 orë shtatë kryesues të vendvotimeve në Klinë

Prokuroria Themelore në Pejë ka njoftuar se janë ndaluar për 48 orë shtatë kryesues të vendvotimeve në komunën e Klinës, në kuadër të hetimeve që lidhen me procesin e numërimit të votave.
Sipas komunikatës së përbashkët të Prokurorisë dhe Policisë së Kosovës, pas autorizimeve të dhëna për Hetimet Rajonale të Policisë së Kosovës, janë intervistuar në cilësinë e të dyshuarve komisionerë dhe kryesues të vendvotimeve.
Pas përfundimit të intervistimeve, me urdhër të Prokurorit të Shtetit nga Departamenti i Krimeve të Rënda, është marrë vendim për ndalimin 48-orësh të shtatë kryesuesve të vendvotimeve.  Prokuroria ka bërë të ditur se brenda afatit ligjor do të parashtrojë kërkesë në gjykatën kompetente për sigurimin e prezencës së të pandehurve në procedurë penale.
Në komunikatë theksohet se Prokuroria Themelore në Pejë, në koordinim me Policinë e Kosovës, mbetet e përkushtuar për ruajtjen e integritetit të votës së lirë të qytetarëve dhe ndjekjen e të gjithë personave që dyshohen për përgjegjësi penale, në përputhje me Kodin e Procedurës Penale dhe Kodin Penal të Republikës së Kosovës./Telegrafi/

Lexo edhe nga Nacionale

“Jetimat e Ballkanit” hyn në treg me produkte ushqimore, Kastrati: Bleni në INTEREX, fitimi shkon për bamirësi Shoqata bamirëse “Jetimat e Ballkanit” ka bërë të ditur se ka nisur prodhimin e produkteve të saj në...