Lionel Messi ka kaluar Kylian Mbappen në garën për “Këpucën e Artë” të Kupës së Botës, pavarësisht se nuk arriti të shënojë në fitoren dramatike 2-1 të Argjentinës ndaj Anglisë në gjysmëfinale.
Argjentina përmbysi rezultatin në Atlanta, pasi fillimisht mbeti në disavantazh nga goli i Anthony Gordon në minutën e 55-të. Megjithatë, Enzo Fernandez barazoi në fund të ndeshjes, ndërsa Lautaro Martinez realizoi golin e fitores në minutat shtesë, duke siguruar kualifikimin në finale.
“Albicelestët” tani synojnë të bëhen kombëtarja e parë që mbron titullin e kampionit të botës që nga Brazili në vitin 1962. Në finalen e së dielës, ata do të përballen me Spanjën në New Jersey.
Në moshën 39-vjeçare, Messi do ta udhëheqë Argjentinën në finalen e tij të tretë të Kupës së Botës, ndërsa është në një pozitë shumë të favorshme për të fituar për herë të parë “Këpucën e Artë” të këtij kompeticioni.
Fituesi tetë herë i Topit të Artë ka shënuar tetë gola në paraqitjen e tij të gjashtë në Kupën e Botës, një më shumë se sa realizoi gjatë triumfit të Argjentinës në vitin 2022.
Po ashtu, ai është tashmë golashënuesi më i mirë në historinë e Kupës së Botës me 21 gola dhe kryeson garën për “Këpucën e Artë”, edhe pse ka të njëjtin numër golash me Kylian Mbappen.
Sipas rregullores së FIFA-s, në rast se dy lojtarë përfundojnë turneun me të njëjtin numër golash, kriteri i parë përcaktues është numri i asistimeve. Në këtë aspekt, Messi ka avantazh ndaj francezit.
Edhe pse nuk shënoi ndaj Anglisë, ylli i Inter Miamit asistoi në të dy golat e Argjentinës, duke e çuar numrin e asistimeve në katër, një më shumë se Mbappe, i cili ka tre.
Nëse edhe numri i asistimeve do të ishte i barabartë, atëherë fituesi do të përcaktohej nga minutat e luajtura, ku përparësi do të kishte futbollisti që ka zhvilluar më pak minuta gjatë turneut.
FIFA e ndan çmimin për futbollistin që shënon më shumë gola gjatë fazës finale të Kupës së Botës.
Nëse edhe asistimet janë të barabarta, fitues shpallet lojtari që ka zhvilluar më pak minuta në turne./Telegrafi/
