Një tjetër shqiptar me rrënjë nga Kosova synon të marrë një ulëse në institucionet politike të Zvicrës.
Lulzim Shala, me prejardhje nga Lipjani, është kandidat për deputet në Parlamentin e kantonit Fribourg (Grand Conseil), në zgjedhjet kantonale që do të mbahen më 8 nëntor 2026.
Shala garon nga radhët e Partisë Liberale-Radikale (PLR), në zonën zgjedhore të Broye-s. Ai është prezantuar në mesin e kandidatëve të kësaj partie gjatë asamblesë së mbajtur më 11 qershor, ndërsa në raportimet e shtypit lokal figuron me vendbanim në Rueyres-les-Prés.
Sipas gazetës lokale “La Broye”, dega e PLR-së në Broye synon të ruajë tri ulëset që aktualisht i ka në Parlamentin kantonal.
Angazhimi politik i Shalës nuk kufizohet vetëm në nivelin kantonal. Emri i tij figuron edhe në listën e kandidatëve të PLR-së për zgjedhjet e vitit 2026 në Këshillin e Përgjithshëm të komunës së Estavayer-së, organi legjislativ komunal, shkruan Telegrafi.
Në mesazhin promovues të kandidaturës së tij vihet në pah rëndësia e përfshirjes së komunitetit shqiptar në jetën institucionale të Zvicrës dhe e pjesëmarrjes aktive në proceset politike e vendimmarrëse.
Zgjedhjet e 8 nëntorit do të jenë një moment i rëndësishëm politik për kantonin Fribourg, pasi qytetarët do të votojnë për përbërjen e re të Parlamentit kantonal, Qeverisë kantonale dhe prefektëve.
Kandidatura e Lulzim Shalës përfaqëson një tjetër rast të angazhimit të shqiptarëve të Kosovës në politikën zvicerane, duke synuar përfaqësim në institucionet vendimmarrëse të vendit ku jetojnë dhe veprojnë./Telegrafi/