Abdul El-Sayed, demokrati që mposhti republikanin Mike Rogers në Michigan, është mjek dhe epidemiolog me profesion, ish-përfitues i bursës prestigjioze Rhodes në Universitetin e Oksfordit dhe njeriu që, në moshën 30-vjeçare, mori përsipër rimëkëmbjen e sistemit shëndetësor të Detroitit pas falimentimit të qytetit.
El-Sayed u shpall fitues të mërkurën në orët e para të mëngjesit, sipas kohës amerikane. Sipas gazetës BridgeDetroit, në atë moment ai printe me gati gjashtë pikë përqindjeje, ndërsa ishin numëruar 85 për qind e votave.
Kush është Sarah Jukaku, bashkëshortja e Abdul El-Sayed që u vu në shënjestër të Trumpit për shkak të hixhabit?
Vendi në Senat ishte i lirë, pasi senatori demokrat në largim, Gary Peters, nuk kishte kandiduar për një mandat tjetër.
“Michigan, ia dolëm!”, u tha ai mbështetësve të tij në Detroit. El-Sayed i falënderoi që i kishin dhënë një shans kandidatit që, sipas tij, kishte më së paku gjasa për të fituar.
Djali i emigrantëve egjiptianë
Abdulrahman Mohamed El-Sayed lindi më 31 tetor 1984 në zonën e Detroitit, në një familje të ardhur nga Egjipti.
Ai u rrit në Detroit dhe në periferitë veriore të qytetit. U edukua nga babai i tij, Mohamed, dhe njerka Jacqueline, me prejardhje nga qarku Gratiot në Michigan.
Ai u diplomua në Universitetin e Michiganit. Gjatë studimeve të mjekësisë fitoi bursën Rhodes, falë së cilës kreu doktoraturën në shëndetin publik në Universitetin e Oksfordit.
Diplomën e mjekësisë e mori në Universitetin Columbia, ku nga viti 2014 ishte profesor asistent në Departamentin e Epidemiologjisë. Sipas revistës Time, 42-vjeçari nuk e ushtroi asnjëherë mjekësinë në praktikë.
Në moshën 30-vjeçare në krye të shëndetësisë së Detroitit
Kryetari i atëhershëm i Detroitit, Mike Duggan, e emëroi në vitin 2015 drejtor ekzekutiv të Departamentit të Shëndetësisë së qytetit. Në këtë mënyrë, në moshën 30-vjeçare, El-Sayed u bë zyrtari më i ri i shëndetësisë në një qytet të madh amerikan.
Detyra e tij ishte të rimëkëmbte një shërbim që ishte privatizuar gjatë falimentimit të Detroitit. Gjatë drejtimit të këtij institucioni, ai kundërshtoi edhe rritjen e emetimeve të dioksidit të squfurit nga rafineria e kompanisë Marathon.
Ai u largua nga kjo pozitë në vitin 2017 për të kandiduar për guvernator të Michiganit. Një vit më vonë, humbi në zgjedhjet paraprake të demokratëve përballë Gretchen Whitmer.
Nga viti 2023 deri në vitin 2025, drejtoi Departamentin e Shëndetësisë, Shërbimeve Sociale dhe Çështjeve të Veteranëve në qarkun Wayne. Që nga viti 2019, ai drejton edhe podkastin “America
Dissected”, ku trajton politikën dhe shëndetin publik.
Rruga drejt Senatit
Kandidaturën e tij e shpalli në vitin 2025, me mesazhin se “në një shtet që ndërtoi ëndrrën amerikane, nuk duhet të jetë kaq e vështirë vetëm të mbijetosh”.
Fushatën e ndërtoi mbi sigurimin shëndetësor universal, zgjidhjen e problemit të borxheve mjekësore dhe rritjen e taksave për miliarderët. Në mbështetje të tij doli edhe ish-presidenti amerikan Barack Obama.
“Abdul është mjek dhe ka dalë kundër interesave të veçanta për të luftuar për vende të mira pune, kujdes më të mirë shëndetësor dhe kosto më të ulëta”, deklaroi Obama.
Në një tubim në Detroit, Obama i krahasoi sulmet ndaj besimit dhe prejardhjes së El-Sayed me ato që kishte përjetuar edhe vetë.
Trumpi komenton për herë të parë disfatën, JD Vance ‘distancohet’ nga presidenti amerikan – LIVE, MINUTË PAS MINUTE
“Ne e kemi parë këtë film më parë. Unë kam luajtur në të”, tha Obama.
Rogers, ish-kongresmen dhe ish-agjent i FBI-së, e paraqiti El-Sayedin si një kandidat tepër ekstrem për Michiganin.
Në fazën përfundimtare të fushatës, presidenti Donald Trump vuri në pikëpyetje besnikërinë e El-Sayedit ndaj Shteteve të Bashkuara, akuza të cilat ky i fundit i hodhi poshtë.
“Emri im dhe besimi im nuk janë arsyeja pse nuk mund ta përballoni karburantin, ushqimet apo vizitën te mjeku”, ishte kundërpërgjigjja e tij.
El-Sayed është i martuar me psikiatren Sarah Jukaku, të cilën e ka njohur gjatë studimeve në Universitetin e Michiganit. Ata u martuan në vitin 2006, kanë dy vajza dhe jetojnë në Ann Arbor. /Telegrafi/