Ish-shefi i CIA-s dhe Boris Johnson shpëtojnë “për një fije”, treni pas tyre u godit nga droni rus

Ish-drejtori i CIA-s, David Petraeus, ndodhej në një tren në stacionin Yahodyn të Ukrainës kur një dron rus goditi një tren pasagjerësh të dielën.

Sulmi ndodhi pak pasi nga i njëjti stacion kishte kaluar një tren diplomatik me ish-kryeministrin britanik Boris Johnson dhe zyrtarë të tjerë evropianë.

Treni diplomatik ishte nisur më herët drejt Polonisë për shkak të kërcënimit nga sulmet ruse dhe kishte kaluar kufirin para goditjes.

Lexo edhe nga Bota

Fitorja e AfD-së trondit Gjermaninë, çfarë sinjali është për pjesën tjetër të Evropës? “Një tërmet socio-politik”, “një moment që shënon kthesë për Gjermaninë”. Kështu e kanë përshkruar analistët politikë dhe shumë...

Ndërkohë, treni ku ndodhej Petraeus ishte ende në stacion.

Hekurudhat ukrainase thanë se është “mjaft e mundshme” që droni të ketë synuar qëllimisht trenin me zyrtarë.

Ish-kryeministri suedez Carl Bildt, i cili ndodhej në një tren tjetër pranë kufirit, publikoi pamje të sulmit dhe evakuimit të pasagjerëve.

Ukraina e cilësoi sulmin si një përshkallëzim të rrezikshëm pranë kufirit me Poloninë dhe paralajmëroi se kërcënimi rus po afrohet gjithnjë e më shumë me territorin e NATO-s dhe BE-së.

Rusia, nga ana tjetër, deklaroi se kishte goditur infrastrukturën hekurudhore në Ukrainën perëndimore që përdoret për transportin e ngarkesave ushtarake nga vendet evropiane.

Sulmi ndodhi në një kohë kur Rusia ka intensifikuar goditjet pranë kufirit polak, duke rritur shqetësimet për sigurinë e Ukrainës dhe të Evropës. /Telegrafi/