Pavarësisht kontrolleve të intensifikuara, gjobave dhe aksioneve të pastrimit, deponitë ilegale mbeten një nga problemet kryesore komunale në Shkup. Gjatë ditëve të fundit janë larguar qindra metra kub mbeturina dhe mbetje ndërtimi, ndërsa janë sanksionuar edhe persona për hedhje të paligjshme të mbeturinave. Ekipet e Ndërmarrjes Publike “Higjiena Komunale” – Shkup gjatë javës së kaluar kanë larguar 650 metra kub mbeturina të rënda dhe mbetje ndërtimore nga sipërfaqet publike në të gjitha komunat e Shkupit. Sasia më e madhe, rreth 170 metra kub, është mbledhur në Komunën e Çairit.
Në të njëjtën periudhë janë mbledhur dhe transportuar 2.700 tonë mbeturina komunale nga familjet dhe personat juridikë në territorin e kryeqytetit. Shërbimet inspektuese të Komunës Qendër kanë kryer kontrolle në 10 vende ndërtimi, ku janë konstatuar mangësi në përmbushjen e detyrimeve ligjore. Janë shqiptuar 6 gjoba në vlerë prej 1.300 eurosh secila, ndërsa janë larguar edhe bllokues dhe shtylla të vendosura në mënyrë të paligjshme në hapësira publike.
Në Kisella Vodë është sanksionuar një person për hedhjen e mbetjeve ndërtimore pranë kontejnerëve. Kryetari i Shkupit, Orce Gjorgjievski, njoftoi gjithashtu se po zhvillohet procedurë për instalimin e kamerave në hapësirat publike, me qëllim zbulimin dhe sanksionimin më të shpejtë të personave që hedhin mbeturina në mënyrë të paligjshme. Policia ndërkohë ka sanksionuar edhe një 22-vjeçar në Shuto Orizar, për hedhje të papërshtatshme të mbeturinave të rënda. Pas shfaqjes së minjve pranë Qendrës Tregtare Bunjakovec, Komuna Qendër njoftoi një deratizim të ri emergjent, vetëm një muaj pas aksionit të mëparshëm.
Deratizimi do të përfshijë pusetat, hapësirat përreth kontejnerëve dhe zonat ku është raportuar prania e brejtësve. Autoritetet theksojnë se vetëm deratizimi nuk është i mjaftueshëm, pasi zbrazja e parregullt e kontejnerëve dhe menaxhimi jo i duhur i mbeturinave krijojnë kushte për shfaqjen e minjve.
Për personat juridikë, gjobat për hedhjen e paligjshme të mbetjeve ndërtimore mund të arrijnë deri në 20.000 euro. Në maj, gjatë një inspektimi në Dolno Lisice, një kamion u kap duke hedhur ilegalisht mbetje ndërtimi dhe u shqiptua gjobë prej 20.000 eurosh. Për raste më të rënda të ndotjes që rrezikojnë mjedisin dhe shëndetin e qytetarëve parashikohen edhe dënime me burg. Në rastin e Vardarishtes, gjykata ka dënuar të pandehurit me tre vjet burg.
Në vendet evropiane, gjobat për hedhje të paligjshme të mbeturinave variojnë nga disa qindra deri në disa mijëra euro, ndërsa në raste të caktuara mund të ketë edhe konfiskim të automjeteve dhe detyrim për mbulimin e kostove të pastrimit. (koha.mk)
