Lufta kundër korrupsionit, sundimi i ligjit dhe përshpejtimi i reformave mbeten parakushte kryesore për përparimin e Maqedonisë së Veriut drejt Bashkimit Evropian. Këto janë mesazhet e pjesëmarrësve në sesionin e 25-të të Komitetit të Përbashkët Parlamentar BE-Maqedoni e Veriut, i cili po zhvillohet në Shkup.
Përfaqësuesit evropianë thonë se besimi në institucione dhe zbatimi i barabartë i drejtësisë janë thelbësore për mbajtjen e të rinjve dhe për zhvillimin afatgjatë të vendit, ndërsa përfaqësuesit e RMV-së përsërisin se integrimi evropian mbetet një qëllim strategjik dhe kërkuan që procesi i pranimit të jetë i parashikueshëm, i besueshëm dhe i bazuar në meritë.
“Të gjitha shtetet anëtare të BE-së po luftojnë korrupsionin dhe asnjëra prej tyre nuk është perfekte. Puna është për të forcuar sundimin e ligjit, por ka dallime në nivelin e korrupsionit midis vendeve. Edhe në Austri ka raste të mëdha korrupsioni, por ndryshimi është se shumë njerëz të pasur përfundojnë gjithashtu para drejtësisë, tha eurodeputeti dhe raportuesi i përhershëm i Parlamentit Evropian për vendin”, Thomas Waitz.
Duke iu referuar Agjendës së Reformave, Waitz theksoi se ndryshimet në Kodin Penal duhet të finalizohen në mënyrë që BE të mund të sigurojë fonde që lidhen me reformat.
“Ekziston një parim në Planin e Rritjes sipas të cilit, nëse një vend nuk i zbaton reformat në kohë, fondet mund të ridrejtohen te vendet fqinje. Për aq sa jam i informuar, Maqedonia e Veriut ka një mundësi reale për të marrë fonde shtesë, ndoshta 70 deri në 80 milionë euro. Por nuk bëhet fjalë vetëm për para. Qytetarët kanë nevojë për një Kod Penal që do të sigurojë një sistem efikas drejtësie dhe do të ngjallë besim në institucione”, theksoi Waitz.
Ai shtoi se një sistem drejtësie funksional ekziston kur rregullat zbatohen në mënyrë të barabartë për të gjithë dhe kur nuk ka pandëshkueshmëri për të fuqishmit. Sipas tij, pagat e përshtatshme për gjyqtarët dhe oficerët e policisë përfaqësojnë gjithashtu një mekanizëm parandalues kundër korrupsionit./Telegrafi/
