Edicioni i shtatë i aktivitetit humanitar “Superheronjtë” do të nisë më 4 dhjetor 2026 në Klinikën e Pediatrisë në Qendrën Klinike Universitare të Kosovës (QKUK), me synimin që fëmijëve t’u sjellë buzëqeshje dhe momente të veçanta.
Sipas njoftimit të organizatorëve, aktiviteti do të vazhdojë edhe në gjashtë qytete të tjera të Kosovës, duke ndërthurur alpinizmin urban, shfaqjet sportive në lartësi, filantropinë dhe gjithëpërfshirjen.
Përmes këtij aktiviteti, organizatorët synojnë të krijojnë momente gëzimi për fëmijët, si dhe të promovojnë vlera shoqërore dhe solidaritetin.
Në prag të edicionit të ri, organizatorët u kanë bërë thirrje bizneseve, partnerëve dhe vullnetarëve që t’i bashkohen nismës dhe të kontribuojnë në realizimin e aktiviteteve.
“Ne sjellim Superheronjtë; Ju na ndihmoni t’i sjellim buzëqeshjet”, thuhet në thirrjen e organizatorëve.
Edicioni i shtatë synon të vazhdojë misionin e kësaj nisme humanitare, duke sjellë aktivitete për fëmijët dhe duke nxitur përfshirjen e komunitetit në mbështetje të tyre. /Telegrafi/
