Sot në Serbi mbahen zgjedhjet e parakohshme për Parlamentin prej 250 ulësesh, ndërsa një lëvizje masive protestash e udhëhequr nga studentët synon të rrëzojë nga pushteti liderin populist prej shumë vitesh, Aleksandar Vuçiq, duke përbërë sfidën më të madhe ndaj sundimit të tij në më shumë se një dekadë.
Zgjedhjet e parakohshme parlamentare, të shpallura nga Vuçiqi në shtator, po mbahen pas gati dy vitesh demonstratash të udhëhequra nga studentët kundër korrupsionit të perceptuar dhe prirjeve në rritje autoritare.
Protestat u nxitën nga vdekja e 16 personave, pasi një strehë e mbuluar në stacionin hekurudhor u shemb në qytetin e Novi Sadit në vitin 2024.
Që atëherë, studentët kanë fituar mbështetje të gjerë, shkruan Reuters.
Radhë jashtëzakonisht të gjata u krijuan në qendrat e votimit në qytete dhe qyteza në të gjithë vendin.
Rezultatet e para pritet të bëhen të ditura rreth dy orë pas mbylljes së qendrave të votimit.
Një fitore e studentëve do të përbënte një ndryshim të thellë politik në këtë vend të Ballkanit, me rreth 6 milionë banorë, duke kujtuar humbjen e Viktor Orbanit në Hungari në prill.
“Është shumë e rëndësishme që të gjithë njerëzit të dalin dhe të votojnë nëse duan të ndryshojnë diçka. Dhe mendoj se ka ardhur koha për ndryshim”, tha avokatja Marija Cvjeticanin në një qendër votimi në Beograd.
Sondazhet parashikojnë një garë të ngushtë. Në një sondazh të Ipsos-it, të publikuar të enjten, Partia Përparimtare Serbe (SNS) e Vuçiqit kryesonte me 47% të votave, kundrejt 40% për studentët. Megjithatë, sondazhe të tjera i kanë nxjerrë studentët në epërsi. /Telegrafi/
