Zëvendësministri i Brendshëm i Shqipërisë, Oltion Muzaka, është përballur me pyetje lidhur me dhunën e ushtruar ndaj protestuesve gjatë një interviste në emisionin “Top Story”, të moderuar nga Grida Duma, ku ndërhyri edhe këngëtari Luiz Ejlli.
Gjatë lidhjes së drejtpërdrejtë, Muzaka deklaroi se qasja e Policisë gjatë protestave të ditëve të fundit ka qenë mbrojtja e qytetarëve, duke përfshirë, sipas tij, edhe rastet kur ata mund të rrezikojnë veten.
“Nuk duhet harruar që është njeriu i parë që duhet të mbrohet, qoftë dhe nga vetvetja. Kjo ka qenë edhe qasja e policisë. Ka pasur dhe minorenë ku me kazma dhe lëndë plasëse, ndoshta kanë lënduar dhe bashkëmoshatarët e tyre”, u shpreh zëvendësministri.
Megjithatë, gjatë emisionit u shfaqën pamje të policëve duke goditur protestuesit, çka bëri që moderatorja Grida Duma ta pyeste Muzakën se si mund të justifikohej një sjellje e tillë nga ana e forcave të rendit.
Në përgjigjen e tij, zëvendësministri theksoi se do të hetohen si protestuesit e dhunshëm, ashtu edhe policët e përfshirë në incidente. “Jemi një shtet ligjor që punon në dy drejtime. Protestuesit e dhunshëm do të hetohen nga policia, ashtu dhe policët. Vetëpërmbajtja ka qenë kryefjala. Kemi pamje dhe video që tregojnë sjellje të ndryshme, ne do t’i hetojmë”, deklaroi Muzaka.
Në debat ndërhyri edhe këngëtari Luiz Ejlli, i cili kundërshtoi shpjegimin e zëvendësministrit, duke vënë në pikëpyetje përdorimin e forcës nga policia edhe pasi protestuesit ishin neutralizuar. “Ju thatë se policia ka për detyrë me neutralizuar njerëzit me kazma, por nga pamjet shohim që e rrëzoi, po pastaj pse i ra? 20 policë, tjetri në tokë, duke e bërë me turne. Është çnjerëzore”, u shpreh Luizi.
– YouTube youtu.be
Ai përmendi gjithashtu rastet e të rinjve të lënduar gjatë protestave, duke deklaruar se 11 të mitur ndodheshin në Spitalin e Traumës. Gjatë përballjes, këngëtari e pyeti drejtpërdrejt zëvendësministrin se kush ishin policët që shfaqeshin në pamjet duke goditur protestuesit.
Muzaka u përgjigj se efektivët e përfshirë në rastet e përmendura ishin pezulluar nga detyra. “Janë policë që janë pezulluar. Edhe policët janë bijë dhe bija të dikujt. Janë ditë të vështira për të gjithë”, tha ai.
Luiz Ejlli përmendi edhe një video tjetër, të xhiruar pranë Piramidës në Tiranë, ndërsa Muzaka konfirmoi se të dyja rastet ishin identifikuar dhe se ndaj efektivëve ishin marrë masa të menjëhershme. “Kryefjala jonë ka qenë vetëkontrolli”, përfundoi zëvendësministri, duke iu referuar qasjes së Policisë gjatë menaxhimit të protestave. /Telegrafi/
