Studiuesit në Institutin Federal Zviceran të Teknologjisë ETH Zurich do të mund të monitorojnë ndryshimet në Tokë përmes një Gjeolaboratori të ri zviceran, i cili tashmë është hapur.
Objekti do të analizojë të dhënat për rrëshqitjet e dheut dhe të korrat, nga selia e tij në kantonin e Lucernës.
Ngritja e kësaj qendre të ekselencës po bashkëfinancohet nga kantoni i Lucernës dhe një fondacion i krijuar nga manjati i ndjerë i orëve, Jörg G. Bucherer. Deri në fund të vitit 2027, ekipi kryesor i laboratorit pritet të përbëhet nga rreth dhjetë persona.
ETH Zurich synon ta shfrytëzojë këtë strukturë për të ndihmuar në përballimin e sfidave mjedisore, raporton Swissinfo, transmeton Telegrafi.
Edhe pse shkenca nuk mund t’i parandalojë ose t’i kthejë pas ngjarje të tilla si rrëshqitjet e dheut, ajo mund të ndihmojë që fatkeqësitë të zbulohen në një fazë të hershme dhe pasojat e tyre të menaxhohen më mirë, ka deklaruar presidenti i ETH Zurich, Joël Mesot.
Institucioni i ri i ETH Zurich do të përdorë të dhëna të mbledhura nga satelitët, dronët, si dhe sensorët e vendosur në tokë dhe në ujë./Telegrafi/
