Aknet nuk janë vetëm një problem i adoleshencës, pasi mund të shfaqen edhe te të rriturit, në fytyrë, gjoks, shpatulla dhe shpinë.
Shkaqet mund të jenë të ndryshme, nga ndryshimet hormonale dhe gjenetika deri te faktorët mjedisorë, ndërsa trajtimi varet nga ashpërsia e tyre.
Një shembull është Gillian Maegan Montalbo, krijuese përmbajtjeje nga Filipinet, e cila kishte akne të lehta gjatë adoleshencës, por ato iu rikthyen më vonë në faqe dhe mjekër. Problemi ndikoi edhe në vetëbesimin e saj në jetën profesionale.
Dermatologët këshillojnë që të kërkohet ndihmë mjekësore nëse aknet vazhdojnë, përhapen, lënë njolla të errëta ose shkaktojnë ndryshime në strukturën e lëkurës.
Sipas dermatologes Crystal Aguh, ekzistojnë trajtime efektive dhe personat që përballen me këtë problem nuk duhet të hezitojnë të kërkojnë ndihmë.
Ndërsa aknet te adoleshentët shfaqen më shpesh në ballë, hundë dhe faqe, te të rriturit, veçanërisht te gratë, ato mund të lidhen me hormonet dhe të përqendrohen përgjatë nofullës dhe mjekrës.
Ato krijohen kur poret bllokohen nga yndyra dhe qelizat e vdekura të lëkurës. Ndikim mund të kenë edhe faktorë të tjerë, përfshirë gjenetikën dhe disa medikamente.
Ekspertët paralajmërojnë se puçrrat nuk duhen shtrydhur, pasi kjo mund të përkeqësojë inflamacionin dhe të rrisë rrezikun e njollave dhe shenjave.
Për aknet e lehta mund të përdoren produkte me peroksid benzoili, acid salicilik ose adapalen, ndërsa rastet më të rënda mund të kërkojnë trajtim të përshkruar nga dermatologu.
Për aknet hormonale, mjeku mund të shqyrtojë edhe alternativa të tjera, si disa kontraceptivë hormonalë ose spironolaktoni. Trajtimi i njollave dhe shenjave mund të kërkojë produkte të posaçme ose procedura dermatologjike, ndërsa rezultatet nuk shfaqen menjëherë. /Telegrafi/
