Një vajzë 12-vjeçare u vra nga të shtënat me armë në Baltimore të SHBA-së, pasi u kap në mes të një përleshjeje mes dy burrave, të cilët dyshohet se po grindeshin për një vendparkim.
Ngjarja ndodhi të shtunën pas orës 18:00, në një park ku fëmijët po luanin futboll amerikan. Sipas policisë, dy burrat nisën të debatonin dhe më pas hapën zjarr ndaj njëri-tjetrit, duke e goditur për vdekje 12-vjeçaren, e cila besohet se po shikonte ndeshjen.
Komisioneri i Policisë së Baltimore, Richard Worley, tha se vajza nuk ishte objektivi i të shtënave. Ajo u dërgua në spital, por nuk mundi t’u mbijetonte plagëve, transmeton Telegrafi.
Në vendngjarje u gjet edhe një grua me plagë armësh, ndërsa dy burra të tjerë shkuan në spitalet e zonës për trajtim. Sipas policisë, të tre të plagosurit kanë pësuar lëndime që nuk rrezikojnë jetën.
Autoritetet janë në kërkim të të paktën dy të dyshuarve, ndërsa hetimet për rrethanat e plota të ngjarjes janë duke vazhduar. Policia ende nuk ka përcaktuar numrin e saktë të të shtënave dhe u ka bërë thirrje dëshmitarëve që të ofrojnë çdo informacion që mund të ndihmojë hetimin.
“Dy burra të rritur u përfshinë në një debat dhe tani një 12-vjeçare nuk është më mes nesh”, tha kryebashkiaku i Baltimore, Brandon Scott.
Ai e cilësoi ngjarjen si një prej rasteve më tronditëse që ka përjetuar, duke theksuar se një fëmijë humbi jetën për shkak të një konflikti mes të rriturve.
Policia po punon për identifikimin dhe arrestimin e personave të përfshirë, ndërsa familja e viktimës dhe komuniteti lokal janë përballur me pasojat e incidentit. /Telegrafi/
