Bodhana Sivanandan, vetëm 11 vjeçe, ka hyrë në historinë e shahut duke u bërë personi më i ri ndonjëherë që fiton titullin Woman Grandmaster (WGM).
Shahistja nga Harrow, në veriperëndim të Londrës, siguroi normën e tretë dhe të fundit të nevojshme për titullin gjatë përfaqësimit të Anglisë në Olimpiadën e 46-të të Shahut në Samarkand të Uzbekistanit, konfirmoi Federata Ndërkombëtare e Shahut (FIDE).
Sivanandan luajti të gjitha 11 ndeshjet në tabelën e parë të Anglisë, pozicioni që i caktohet lojtareve kryesore të ekipit, dhe e përfundoi turneun me tetë pikë, transmeton Telegrafi.
Ajo e kishte kaluar më herët edhe pragun prej 2300 pikësh të renditjes, ndërsa me normën e fundit plotësoi të gjitha kushtet për titullin WGM.
“Jam e lumtur që e bëra, por dua të vazhdoj dhe të shkruaj edhe më shumë histori, në vend që të ndalem këtu”, tha Sivanandan për FIDE.
Arritja e saj vjen pas një serie rekordesh të jashtëzakonshme. Ajo është bërë tashmë kampionia më e re britanike në shah për femra dhe, sipas Federatës Angleze të Shahut, personi më i ri që ka përfaqësuar Anglinë në arenën ndërkombëtare në çdo sport.
Rekordi i mëparshëm për titullin WGM mbahej nga Kateryna Lagno, e cila e fitoi atë në moshën 12-vjeçare. Edhe shahistja kineze Hou Yifan e fitoi titullin në moshën 12-vjeçare, ndërsa ajo mbetet femra më e re që ka fituar titullin më të lartë, Grandmaster (GM), në moshën 14-vjeçare.
Titulli Woman Grandmaster është titulli më i lartë i shahut i rezervuar vetëm për femrat dhe mbahet gjatë gjithë jetës.
Por Sivanandan nuk po ndalet me kaq. Në Samarkand ajo siguroi edhe normën e dytë për titullin International Master (IM), duke iu afruar një tjetër objektivi madhor.
Për t’u bërë International Master, një shahist zakonisht duhet të sigurojë tri norma dhe një vlerësim prej të paktën 2400 pikësh. Sivanandan tashmë ka dy norma IM.
Titulli International Master është i hapur për të dyja gjinitë dhe renditet më lart se titujt që ajo mban aktualisht, Woman Grandmaster dhe Woman International Master.
11-vjeçarja thotë se shahu i pëlqen edhe përtej konkurrimit. “Më pëlqen të udhëtoj dhe, duke qenë se ndjek shkollën me kohë të plotë, shahu lidhet edhe me shumë lëndë shkollore. Është shumë i dobishëm edhe për këtë”, tha ajo.
Babai i saj, Siva, kishte treguar më herët për BBC-në se nuk e dinte nga e kishte trashëguar vajza talentin për shah, pasi as ai dhe as bashkëshortja e tij, të dy të diplomuar në inxhinieri, nuk janë shahistë.
Rruga e Sivanandan drejt majave ka qenë jashtëzakonisht e shpejtë. Ajo mësoi të luante shah vetë gjatë izolimeve të pandemisë së COVID-19 dhe mori pjesë në turneun e saj të parë në Harrow Chess Club në korrik të vitit 2021.
Vetëm një vit më vonë, në moshën shtatëvjeçare, ajo fitoi të 24 ndeshjet e saj në Kampionatin Evropian të Shkollave.
Në vitin 2023, Sivanandan u bë personi më i ri që shmangu humbjen ndaj një Grandmasteri në një ndeshje zyrtare, gjatë Kampionatit Evropian të Shahut të Shpejtë dhe Blitzit në Kroaci.
Një vit më pas, në moshën nëntëvjeçare, ajo u përzgjodh për të përfaqësuar Anglinë në Olimpiadën e Shahut në Budapest. Kjo e bëri, sipas Federatës Angleze të Shahut, personin më të ri që ka përfaqësuar Anglinë në një garë ndërkombëtare në çdo sport.
Në vitin e kaluar, kur ishte vetëm 10 vjeçe, ajo u bë shahistja më e re femër që mposhti një Grandmaster, pasi fitoi ndaj Peter Wells në Kampionatin Britanik të Shahut.
Në korrik të këtij viti, Sivanandan siguroi normën e saj të parë IM në Dole Open në Francë, duke u bërë vajza më e re që e arrin këtë sukses, në moshën 11 vjeç e katër muaj.
Në të njëjtin turne ajo mposhti edhe Grandmasterin Marc’Andria Maurizzi, duke u bërë vajza më e re e njohur që ka mundur një shahist me vlerësim mbi 2600 pikë në një ndeshje klasike.
Tani, me titullin WGM në duar, Sivanandan ka vendosur një tjetër rekord historik – por duket se për të ky është vetëm fillimi. /Telegrafi/
