Pesë të arrestuar pranë bazës ajrore britanike – hetohen për përgatitje të aktit terrorist

Pesë persona janë arrestuar në Britani nën dyshimin për përgatitjen e një akti terrorist, pas një incidenti të rëndë pranë bazës ajrore RAF Fairford, që detyroi autoritetet të evakuonin rreth 85 familje nga zona.

Policia e Gloucestershire deklaroi se një “incident madhor” ishte shpallur në zonën e Whelfordit, ndërsa një ekip special i ushtrisë për çaktivizimin e mjeteve shpërthyese po ekzaminonte disa automjete të dyshimta.

Ngjarja nisi pas një raportimi të marrë gjatë natës, sipas të cilit tre automjete të dyshimta po lëviznin drejt RAF Fairford rreth orës 00:45 të së dielës, transmeton Telegrafi.

Oficerët e armatosur ndërhynë në vendngjarje dhe arrestuan pesë burra fillimisht nën dyshimin për vepra penale sipas ligjit britanik për eksplozivët. Më vonë, ndaj tyre u ngrit edhe dyshimi për përgatitje të një akti terrorist.

Lexo edhe nga Bota

Dy të vdekur, disa të tjerë të lënduar – pasi autobusi turistik doli nga rruga dhe u përmbys në Gjermani Dy persona raportohet të kenë gjetur vdekjen pas një aksidenti në autostradën 96, pranë Buchloe-s në rajonin Ostallgäu,...

Hetimin tashmë po e udhëheq policia kundër terrorizmit e Metropolitan Police. Pesë të dyshuarit mbeten në paraburgim.

Autoritetet kanë vendosur një perimetër sigurie prej rreth 400 metrash rreth automjeteve, ndërsa ekipi i ushtrisë vazhdon ekzaminimet. Për shkak të operacionit, rreth 85 familje janë këshilluar të largohen përkohësisht nga shtëpitë e tyre.

Policia tha se incidenti besohet të jetë i kufizuar dhe se nuk ka rrezik të menjëhershëm për komunitetin, ndërsa operacioni vazhdon sipas planeve të paracaktuara të emergjencës.

RAF Fairford ndodhet pranë Whelfordit dhe është një bazë e rëndësishme ushtarake që pret edhe forcat e Forcave Ajrore të SHBA-së.

Sipas USAF, baza është selia e 501st Combat Support Wing dhe 420th Air Base Squadron, ndërsa shërben gjithashtu si një nga lokacionet kryesore në Evropë për operimin përpara të bombarduesve të Komandës Globale të Goditjes së Forcave Ajrore amerikane.

Incidenti merr një dimension të veçantë edhe për shkak të kërcënimeve të mëparshme iraniane. Në korrik, Garda Revolucionare Islamike e Iranit (IRGC) kishte paralajmëruar Britaninë për lejimin e operimit të bombarduesve amerikanë nga RAF Fairford.

“Çdo bazë që përdoret për të sulmuar territorin e Iranit është objektivi ynë legjitim”, kishte deklaruar IRGC-ja, sipas agjencisë gjysmëzyrtare iraniane Tasnim, duke pretenduar se SHBA-ja po përdorte bombardues B-1 nga baza në Fairford.

Hetuesit britanikë nuk kanë bërë ende të ditur nëse incidenti i së dielës ka ndonjë lidhje me kërcënimet iraniane apo me ndonjë grup të caktuar terrorist. /Telegrafi/