SPAK ka zbardhur komunikime mes ish-drejtueses së Shërbimit Informativ të Shtetit, Vlora Hysenit, dhe Ergys Agasit, duke ngritur dyshime për një marrëdhënie personale mes tyre, si dhe për komunikime të vazhdueshme lidhur me çështjen penale ku është përfshirë Agasi.
Në telefonin e Ergys Agasit, SPAK ka gjetur komunikime me shkrime, foto dhe video me Vlora Hysenin.
Nga fundi i qershorit deri në ditën e arrestimit, mes tyre janë shkëmbyer mbi 100 telefonata dhe mesazhe.
Sipas hetimeve, Hyseni i tregonte Agasit për takimet që zhvillonte me kryeministrin dhe drejtuesin e Policisë së Shtetit.
Në komunikimet e siguruara nga hetuesit, sipas informacioneve të bëra publike, shfaqen edhe shprehje të tilla si: “Zemër, thjesht duhet të koncentrohemi te halli jot”, “Të gjithë ne” dhe “Do përfundojmë keq, shpirt”.
Sipas SPAK, përtej dyshimeve për lidhjen personale, Hyseni dyshohet se është përfshirë edhe në çështjen penale të Agasit, duke shfaqur gatishmëri për ta ndihmuar dhe duke vënë në dispozicion cilësitë e saj zyrtare dhe kapacitetet institucionale që drejtonte. /Oranews/
